(117) Eva


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw story Adam kefys yn fenowgh i’n textow Kernowek. Ha heb mar yth yw Eva, gwreg Adam, person a bris i’n whedhel. Rag ensampyl Tregear a lever ow tùchya Eva, yth o hy an kensa benyn bythqweth a veu. …Ha’n venyn an Tas a’s gwrug perfect. In tyller aral yma Tregear owth avowa nag o Eva mar skentyl avell Adam. Rag hedna an Tebel-el êth kyns oll dhedhy hy rag hy themptya. Dell lever Tregear: ev ny wrug cessya dre creft ha dre qwestyonow adro dhe Eva neb o an gwannha in power ha’n medalha vessyl bys may whrug gwil dhedhy terry comondment an Tas. In Origo Mundi yth yw oll an whedhel a kensa pegh Adam hag Eva dysplêtys dhyrag an woslowysy. Warlergh Eva hag Adam dhe dhebry frût a’n wedhen dhyfednys, Duw a wovyn orty:

Eva, prag y whrusta sy

tùlla dha brias heken

an aval worth y derry

wosa my dhis dh'y dhyfen?

Saw yth yw an gwary Creacyon an Bÿs an text Kernowek mayth yw personoleth Eva dysqwedhys dhe’n gwelha. Yma kescows hir i’n gwary inter hy ha’n Serpont, hèn yw an Jowl. An Jowl a whela dhe wil dhe Eva cresy fatell vëdh dh’y les hy tastya an aval dyfednys. Rag leverel an gwiryoneth nyns yw re gales an assay dhodho, rag Eva yw nebes gocky. Dell lever hy adro dhedhy hy honen:

Skians benyn yw brottel,

ha nynj ov over-sotel.

Wàr an dyweth Eva a dheber an aval, ha lacka, otta hy worth y offra dhe Adam hy gour. Hy a lever dhodho:

Mirowgh, mirowgh orth hebma!

’Tobma gaya aval dhis!

Mar qwreth tastya anodho

ev a drail dhyso dhe les

moy ès milyow a bunsow.

Nyns yw Adam pÿs dâ dhe dhebry a’n aval hag ytho yma Eva ow qwil godros dhodho. Hy a lever:

Mir, kebmer an aval teg,

pò sur inter ty ha’th wreg

an gerensa qwît a fyll

mar ny vydnyth y dhebry.

In udn gola worty Adam a dheber a’n aval hag y aga dew yw melegys gans Duw ha warbarth gansans oll kynda mab den wàr aga lergh. Saw gesowgh ny dhe dhewheles nebes. Wosa gwil dhedhy debry a’n wedhen forbyddys, yma an Tebel-el ow perswâdya Eva dhe ry radn a’n aval dhe Adam. Eva a worthyp:

Ny vanaf bos mar grefny

dhe wetha oll ow honen.

Adam sur dres pùb huny,

me a’n car — pò Duw dyfen!

dh’y wetha heb y shara!

Hèn yw ensampyl marthys dâ a’n dra gelwys geseth dramatek pò ‘dramatic irony’. Duw dyfen dh’y wetha heb y shara! yn medh Eva. Saw debry an aval yw an dra poran a wrug Duw dyfen dhedhans.