© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

I’n Testament Coth y hyll bos redys an story a Dhavyth ha’y avoutry gans Bersabe, gwreg Ùrry Hittyas. Yma Davyth ow qweles benyn pòr deg ow colhy hy honen in lowarth adâl y balys. Ev yw lenwys a dhrog-whans rygthy hag a gomond hy dhe vos drÿs dhodho, may halla ev gorwedha gensy. Yma Davyth ha’n venyn ow peha warbarth, saw pàn wrella Bersabe dewheles tre, hy a wor hy dhe vos gans flogh. Yma Davyth owth erhy ena may fe Ùrry, gour Bersabe, danvenys dhe’n vatel ha settys i’n voward dhyrag oll an lu may fe va i’n peryl brâs a vos ledhys. Ùrry yw ledhys ha Davyth yw frank ena dhe gemeres Bersabe yn gwreg. An profet Nathan a dheu dhe Dhavyth hag a dherif whedhel dhodho. Yth esa dew dhen, yn medh ev. Onen o rych hag ev a’n jeva lies davas. An eyl o bohosak ha ny’n jeva ev ma’s udn on benow o meur-gerys ganso. Pàn dheuth stranjer dhe jy an den rych, ev a sparyas oll y dheves y honen, saw ev a sêsyas on bian an den bohosak, y ladha ha’y ry avell boos dh’y ôstyas. Pàn glôwas Davyth hedna, ev a sorras brâs ha cria in mes fatell o wordhy an den rych dhe sùffra mernans. Nathan a worthebys ‘Te yw an den.’ An flogh esa Bersabe ow ton dhyworth hy avoutry a verow. Aga secùnd mab yw genys hag ev yw gelwys Salamon. Ev a vÿdh mytern warlergh Davyth y das. Yma versyon dramatek a’n whedhel-na kefys i’n gwary Kernowek Origo Mundi. Yma nebes dyffransow inter narracyon an Beybel ha’n gwary Kernowek. I’n Beybel rag ensampyl yth yw an profet Nathan usy ow jùjya Davyth. I’n Origo Mundi an devar-na yw colenwys gans el dhyworth nev. Yma dyffransow erel inwedh, saw an dyffrans brâssa intredhans yw hebma: nyns yw ger vëth dhyworth Bersabe recordys i’n Beybel. I’n gwary Kernowek wàr an tenewen aral, hy yw onen a’n warioryon hag in gwir hy yw exampyl uthyk a wadn-wre’ty pò ‘adulteress’. I’n gwary yma hy ow kentrydna Davyth dhe ladha hy gour ty lafyl. Pelha wosa Ùrry dhe leverel yn trist dhedhy fatell yw res dhodho dyberth rag metya in batel gans eskerens an mytern, Bersabe a lever dhodho:

Ogh, govy pàn veuv genys!

Gans moreth yth ov lenwys

wàr dha lergh, ow arlùth wheg!

hag ena adenewen:

Saw bynner re dhewhylly

genes me a wra pesy,

ha henna a via teg!

In Origo Mundi nyns yw Davyth frank a begh, saw Bersabe, an wadn-wre’ty, yw meur dhe vlâmya kefrÿs.