(124) Mernans Pylat


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

I’n tressa gwary a’n Ordinalia, Resurrexio Domini yma darn hir ow tùchya Mernans Pylat. Tybery emprour Rom yw clâv a lovryjyon. Ev a glôw fatell yll y sawya den henwys Jesu. Ev a dhanvon messejer dhe Pylat rag erhy dhodho may whrella dry Jesu bys in Rom. Pylat a lever na yll Jesu bos kefys. Yma an messejer ena ow metya gans benyn henwys Vernona ha hy a lever an gwiryoneth dhodho: Jesu yw marow ha Pylat a’n ladhas. Hy a lever bytegyns fatell usy qweth in hy fosessyon ha pyctour a fâss Jesu warnedhy. An gweth-na a wra sawya an emprour. Vernona ha’n messejer â dhe Rom ha Tybery yw sawys der an gweth. Pàn glôwa an emprour a vernans Jesu, yma va ow somona Pylat dhe Rom. Pàn dheffa Pylat dhyrag an emprour, yma pows Jesu adro dhodho. Indelha ny yll an emprour bos serrys ganso. Saw Pylat yw wàr an dyweth constrînys dhe dhysky an bows. Tybery a lever dhe Pylat dre rêson ev dhe worra Jesu Crist, savyour an bÿs, dhe’n mernans, yth yw res dhodho sùffra an hackra mernans bythqweth a veu. Pylat yw tôwlys in pryson hag ena rag ewn euth ev a ladh y honen. Yma an tormentours ow whelas encledhyas corf Pylat saw ny wra an dor recêva y gorf. An corf a labm in mes a’n dor moy ès unweyth. Ena corf Pylat yw settys in trog a horn ha tôwlys i’n ryver. Saw yma an corf ow posnya an dowr hag yth yw lies onen ledhys dredho. Wàr an dyweth corf Pylat yw settys in scath neb yw herdhys in mes i’n mor brâs. Yma hedna ow terevel hager-awel ha hy ow mos wàr an dowr bys in carn carygy. Ena an dhewolow a dheu rag kemeres corf hag enef Pylat gansans bys in painys heb dyweth in iffarn. Yma genama try foynt dhe leverel adro dhe’n whedhel-ma. Kensa, i’n tyleryow erel benyn an clout, usy fâss Jesu warnodho, yw gelwys Veronyca. Coynt yw ytho hy dhe vos gelwys Vernona i’n gwary Kernowek. Secùnd yth yw dhe nôtya kefrÿs i’n gwary pana asper yw Tybery emprour ha Vernona tro ha Pylat. Whensys yns y a dôwlel dial warnodho rag mernans Crist, saw nyns usons y ow perthy cov a dhyscas Crist y honen ow tùchya mercy. Tressa yma try gwary i’n Ordinalia: Origo Mundi pò ‘Dallath an Bÿs’, Passio Christi pò ‘Passyon Crist’, ha Resurrexio Domini pò ‘Dasserghyans an Arlùth.’ Yma part vrâs dhe Vernona in Resurrexio Domini pàn nag yw hy complys in tyller vÿth in Passio Christi. Yth hevel ytho fatell veu an dhew wary-na screfys gans auctours dyffrans.