(136) Calesvol


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Cledha Arthùr Mytern yw aswonys in Kembrek avell Caledfwlch. Mênyng an hanow-na yw ‘hard cleft’, ow referrya dhe nerth an cledha dhe drehy kig ha horn. Yma an hanow Caladbolg kefys i’n tradycyon Godhalek, le mayth ywa cledha an gwerrour brâs Fergus mac Róich. Dell hevel ny veu Caledfwlch benthygys dhyworth an hanow Godhalek na Caladbolg dhyworth Caledfwlch; ytho yma Cledfwlch ha Caladbolg ow tos dhyworth an keth hanow ragistorek. Yth yw cledha Arthùr Mytern complys i’n gwary Kernowek Bewnans Ke in dadn an form Calesvol. Rag Calesvol yma Jeffry Menow owth ûsya an form Calybùrnùs, hag ev a lever fatell veu va gevellys in Enys Avallon, enesow paradîs an Vretonyon Goth. An hanow Calybùrnùs yw an wredhen rag an furvyow dyffrans in Frynkek ha Sowsnek, Caliborne, Callibourc, Calibore, Escaliborc hag Escalibour. Yma moy ès udn whedhel ow terivas fatla gafas Arthùr y gledha. Onen anodhans yw kepar dell sew: Yth esa in Peneglos Powl Sans in Loundres men pedrak brâs ha warnodho anwan pò ‘anvil’. Glenys i’n anwan yth esa cledha, mayth o screfys adro dhodho an lavar-ma: Pynag oll a wrello tenna an cledha in mes an anwan-ma yw mytern lafyl an wlascor. Ny ylly den vÿth tedna an cledha in mes, saw Arthùr, kyn nag o va ma’s marhak yonk, a spêdyas dh’y dedna in mes heb caletter vÿth. Indelha y feu Arthùr declarys mytern Breten Veur. Herwyth whedhel aral y feu Calesvol rÿs dhe Arthùr gans Arlodhes an Lydn termyn cot wosa Arthùr dhe dhallath rainya. Yma an secùnd whedhel-na owth acordya gans narracyon aral. Orth dyweth y rain, Arthùr a vetyas gans Modres traitour in Cas Camlan hag ev a’n ladhas, saw ev y honen a veu tebel-wolies. Ev a ros Calesvol dh’y varhak lel Bedwyr may whrella va y dôwlel aberth i’n lydn. Pàn dheuth Bedwyr dhe’n lydn, ev a dednas an cledha mes a’y woon, ha dell lever an prydyth:

an loor avàn in nosweyth gwâv a dheuth

ow splanna in mes adhan an comol hir

ha dywy rew an dur gans lorgan cler.

Ass esa ow lentry an carn gans adamant,

topaz dynyver ha tan tegynnow drûth

mar feythus gwrës!

Bedwyr a veu mar hudys gans an cledha, may whrug ev sconya dywweyth dhe wil warlergh arhadow an mytern. Saw Arthùr, kynth esa ev in newores, a vraggyas Bedwyr, ow leverel y whrussa ev y ladha gans y dhêwla noth y honen, mar ny whre va tôwlel an cledha dhyworto. An tressa treveth Bedwyr a dhewhelys dhe amal an dowr ha tôwlel an cledha aberth in cres an lydn. Ena bregh in paly gwydn a dheuth in mes a’n dowr, sêsya an cledha, y swaysya ha’y dedna in dadn an dowr. Indelha Calesvol êth in kerdh dhyworth golok an dus.