(144) Howlsav an Gwâv


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma howlsav an gwâv pò ‘the winter solstice’ ow codha an secùnd dëdh warn ugans a vis Kevardhu. In Kernowek an unegves mis a’n vledhen yw gelwys mis Du ha’n mis dewetha yw mis Kevardhu, hèn yw an mis adâl mis Du. I’n brës Keltek yth yw cres an gwâv kelmys gans tewolgow ha duder. In Godhalek rag ensampyl an dedhyow cot dhyrag Nadelyk yw aswonys avell gearróga dubha na Nollag pò ‘dedhyow cot du an Nadelyk.’ Pelha cres an gwâv in Godhalek yw gelwys dúluachair, hèn yw dhe styrya golêwder duhës.’ Yma rêson rag an henwyn-na. In cres an gwâv y fëdh lies huny ow sùffra gans an cleves aswonys hedhyw avell ‘seasonal affective disorder’ pò in Kernowek cleves dyglon sêsonek. Nebonen usy ow codhevel gans an cleves-na a wra omglôwes trist i’n gwâv spessly in mîsyow Du, Kevardhu ha Genver; ny vëdh cris vëth dhodho ha dre lycklod ev a wra cùsca termyn hir. Yth yw an cleves kelmys heb dowt vëth gans an lack a wolow dres an gwâv. Yma moy ès naw an cans a boblans Fynlond ow sùffra gans an cleves, ha liesgweyth moy kebmyn yw an cleves i’n Stâtys Udnys in Alasca ès in Floryda. An dyghtyans gwelha rag an cleves yw sawment golow, hèn yw dhe egery an godhevyas dhe dermynyow hir a wolow spladn. Kelmys yw an dysês kefrës gans cleves methêwnep. Mars yw nebonen owth omsensy morethak, moy lyckly ywa dhe eva yn poos. Hèn yw problem brâs in Swêden, le na yll dewosow medhow bos pernys ma’s in shoppys an stât. Yth yw cleves dyglon sêsonek part a’n rêson mayth eus kebmys pednow medhow in Rùssya. Heb mar nyns yw dewosow medhow a brow vëth pàn vo nebonen morethak, rag moy lyckly yns y dhe wethhe an dysês ès yw sawya. Rag dyffres aga honen warbydn an dysês i’n gwâv y fëdh treven in Swêden ha Norgagh golowys glew ha spladn wàr jy. An tredhegves dëdh a vis Kevardhu in Swêden yw Degol Lûcy, an sanses nacyonal, ha’n jëdh-na y fëdh mowes vian gwyskys in gwydn hag y fëdh cùrun a gantolyow settys wàr hy fedn. Golowys gans pîlyow tredanek yw an cantolyow hedhyw i’n jëdh, rag goheles drog-labmow. Heb mar yma an Nadelyk ow tos in very cres a’n gwâv ha’n sêson rag an moreth sêsonek. Degol an Nadelyk yw aswonys i’n powyow Loghlyn avell jól, júl ha traweythyow in Pow an Sowson avell ‘yule’. Dre lycklod yth yw an hanow-na dhe gelmy gans an ger Sowsnek jolly, ha jolyf in Kernowek. Yma hedna oll ow poyntya dhe udn dra; poblow an North a wodhya bos peryl a dristans i’n cres an gwâv hag y a dhysplêgyas fordhow rag scafhe colon pùbonen in sêson an tewolgow.