(145) An vledhen eus passys


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An vledhen eus passys, hèn yw dyw vil hag êtek, a veu pòr dhâ ow tùchya an tavas Kernowek. Kyns oll Ian Jackson a dhyllas y erlyver nowyth Gerlyver Kescows, screfys in Kernowek Standard: nùmber a’n pedneryow i’n lyver yw adro dhe bymp mil. Ha tro ha dyweth an vledhen an keth auctour a dhyllas ken gerlyver henwys Kescows Nebes Moy. Keslowena dhe Ian Jackson! Ena me a veu plêsys brâs pàn wrug Evertype rag an kensa prës bythqweth gwainya gober in kestrîf Holyer an Gof. An lyver neb a veu enorys o Pystrior Marthys Pow Òz, trailyans gwrës genef vy a ‘The Wonderful Wizard of Oz’ gans Frank Baum. An lyver yw olsettys in spladn dres ehen gans oll an lînenansow gwredhek; ha ro perfëth via rag Nadelyk. In avarr in mis Hedra Ray Chùbb a wrug mora y versyon in Kernowek Udnys a Bêwnans Meryasek. Me a veu i’n tyller rag an morans. Yma trailyans Sowsnek ryb an text Kernowek ha’n lyver heb dowt a vëdh a brow brâs rag dyscoryon Kernowek. Pelha yma rew a byctours lywys daspryntys i’n lyver ha wàr an gudhlen inwedh. An lymnansow-na a veu fotagrafys in eglos Pontivy in Breten Vian, tyller yw Meryasek kelmys ganso. An pyctours a veu provies gans Clive Baker. An morans a wharva in Eglos Martyn ha Meriadoc in Cambron ha heb mar Meriadoc yw an versyon Bretonek a’n hanow Meryasek. Y hyll vuys dhyworth an morans bos gwelys wàr YouTube in Gwydhyow Radyo an Gernewegva henwys An Mis. Me a gafas chauns dhe omdhysqwedhes in gwydhyow an Mis hevleny; an kensa treveth yth esen ow côwsel adro dhe’n caleterow rag Wordhen mar teu an Wlascor Udnys ha gasa an Udnyans Ewrôpek. An secùnd treveth me a gowsas adro dhe whythrans nowyth usy ow tysqwedhes fatell usy nyver owth encressya yn frâs a’n vysytyoron dhe Gernow a wor neppÿth adro dhe wonesygeth Keltek Kernow. Lies huny a’n vysytyoryon a lever inwedh y fedha dâ gansans desky nebes geryow Kernowek. Yma an whythrans-na tôkyn a wovenek rag termyn devedhek an tavas. Dres pùptra me a dal aswon meur râss dhe Matthi ab Dewi dre rêson ev dhe brovia kerhyneth dhybm in Radyo an Gernewegva may hallama côwsel Kernowek pùb seythen adro dhe vaters dyvers. Radyo an Gernewegva hag An Mis yw a valew brâs dres ehen rag spêda an tavas Kernowek, rag ymowns y ow profya Kernowek côwsys dhe dhyscoryon a’n tavas. Pelha drefen bos clôwys pùb sort a Gernowek inhans, y hyll bos gwelys fatell yw trufyl in gwiryoneth dyffransow a spellyans. Gesowgh ny oll ytho aswon grâssow brâs dhe Matthi rag y dhywysycter dres an vledhen eus passys, dyw vil hag êtek.