(147) Fenten Lujuan


© 2018 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Nebes dhe’n north ÿst a Pensans yma pluw gelwys Lujuan in Kernowek ha Ludgvan in Sowsnek. Yma certan scoloryon ow tyby fatell yw res kelmy an hanow Lujuan gans an ger lujow ‘ashes’. Yma pobel erel ow cresy y vos hanow a sans aswonys in scrîvyow dhyworth an peswardhegves cansvledhen avell Ludewan, Ludwan pò Lewdegran. Kyn na yllyn ny bos sur y feu Ludwan Sans bythqweth i’n bÿs, yma whedhlow coynt derivys adro dhodho. Yma leverys fatell esa an Sans ow qwil y bejadow in tyller sëgh. Ev a besys Duw ha fenten a dhowr glân a spryngyas in bàn in mes a’n dor. An Sans a bêsyas gans y bejadow, hag ena rag prevy vyrtu an dowr ev a wolhas y lagasow ino. Y lagasow a veu gwrës mar alosek may halla ev gweles taclow pòr vunys. An Sans a besys arta hag ena eva nebes a’n dowr. Ev a dhyscudhas fatell ylly ev lebmyn formya lavarow heb caletter vëth ha’y gows dhe vos gwrës helavar. An sans a dhuryas gans y bejadow hag a besys indelma: a pe flogh yonk vëth besydhys in dowr dhyworth an fenten-ma, an keth flogh dhe vos gwethys wàr lovan an cregor. Ny ylly mab na mowes besydhys gans an dowr-na bos hangys gans cregor vëth. Nebes bledhydnyow warlergh hedna mabm ha tas a dhros aga mab dhe Ludwan Sans dhe vos besydhys. Saw orth an besydhyans an Jowl a sêsyas an flogh. Ludwan a spêdyas dhe dhrîvya an Jowl in mes a’n flogh, saw pàn esa ev ow tyberth, an Jowl a drewas i’n fenten. Ha trefyas an Jowl a wrug shyndya vyrtu an dowr. Nyns o an dowr abyl dhe lebma an lagasow na felha na dhe wil helavar an tavas. Nyns o gesys ma’s an gwith rag lovan an cregor. Lies bledhen warlergh hedna namna wrug fenten Lujuan kelly y er dâ. Tiak a’n bluw a verwys ha seythen warlergh y vernans y wre’ty a dhemedhas arta. Kyns oll an gentrevogyon a gresy an gour ty dhe verwel a gleves, saw y a remembras na wrug y wreg acordya re dhâ ganso. Ha pelha yth esa hy ow cowethya gans hy secùnd gour pàn esa an kensa gour whath ow pêwa. Wàr an dyweth corf an den marow a veu palys in bàn. Dyscudhys veu meur a orpyment pò ‘arsenic’ in y gorf. An venyn a veu drës dhyrag an gort, tries yn ewn ha cregys. Saw hy o genesyk a Bluw Lujuan hag ytho hy a veu besydhys i’n dowr sans. Tùllys brâs veu pobel an bluw, erna veu dyscudhys an wadn-wre’ty dhe vos besydhys i’n nessa pluw. Assa wrussons rejoycya pàn glowsons na veu hy besydhys gans dowr a fenten Lujuan. Ytho nyns o rêson vëth dhe dhowtya gallos an dowr.