(150) Trelawny 1


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

'Verow Trelawny brâs?

’Verow Trelawny brâs? 

Mès ugans mil a dus Kernow

A woffyth oll an câss.

An re-na yw geryow penn pùsorn ‘Trelawny’ pò ‘Cân Tus an West’ in y versyon Kernowek. An gân a veu screfys in Sowsnek gans Robert Hawker i’n kensa qwarter a’n nawnjegves cansvledhen hag yth yw hy consydrys yn fenowgh dhe vos Antempna Kenedhlek Kernow. Y feu an gân trailys dhe Gernowek orth dallath an ugansves cansvledhen gans Henry Jenner. Kilva istorek an gân hag istory an gân hy honen yw completh lowr ha res vÿdh dhybm spêna nebes seythednow warnodhans. An lavar Sowsnek ‘Shall Trelawny die’ yw kemerys dhyworth gwers coth, neb o cresys gans lies huny dhe referrya dhe Jonathan Trelawny in y strif gans an Secùnd Jamys. Dre lycklod bytegyns an Trelawny complys yw Jowan Trelawny. Ev a veu genys ogas dhe Langordhow pò Fowey orth dyweth an whêtegves cansvledhen. Adro dhe’n vledhen mil whegh cans deg warn ugans ev a veu maglys i’n strif inter Charlys Mytern ha parlement. Heb mar an mytern o whensys dhe weles dôwysys dhe’n seneth esely faverus dhodho y honen. In Kernow Dûk Bùkyngam ha Jamys Bragg o chif-scodhoryon an mytern. Y a wrug cùntell bagas a jùstyssyow, meur aga roweth, dhe wythresa abarth an mytern. I’n dedhyow-na William Coryton ha Syr Jowan Elyot o nyverys in mesk eskerens moyha wherow an mytern, hag y a dheclaryas aga bos porposys dhe sevel in Kernow avell ombrofyoryon dhe’n parlement. Ny veu Dûk Bùkyngam na Jamys Bragg plêsys gans hedna hag in mesk taclow erel y a screfas lytherow dhe dhôwysyoryon Kernow ow comendya dhodhans na wrellens dôwys naneyl Coryton nag Elyot. An lytherow-na a veu sînys gans oll an jùstyssyow arfedhys gans Bùkyngam ha Bragg. Jowan Trelawny o uhel-sheryff Kernow i’n termyn-na hag ev o onen a’n jùstyssyow a worras aga dorn dhe’n lytherow. Ny wrug soweny an keskergh warbydn eskerens an mytern, rag y feu Coryton hag Elyot dôwysys. Ena parlement a somonas oll an jùstyssyow neb a sînas an lytherow warbydn Coryton ha Elyot dhe dhos dhe Loundres rag styrya aga honen. An jùstyssyow bytegyns a sconyas obeya. Y a veu dalhednys ha dew anodhans, Jowan Trelawny ha’y goweth Walter Langdon, a veu prysonys§ in Tour Loundres. Dell hevel hedna a veu ocasyon a’n lavar ‘Shall Trelawny die?’ Ny wrug Trelawny merwel; kettel veu parlement keskerys, Mytern Charlys a wrug delyfra Jowan Trelawny mes a’n Tour ha pelha ev a’n gwrug baronet. Nessa seythen me a vydn côwsel a vab wydn Syr Jowan Trelawny, hèn yw Jonathan Trelawny, ha’y strif hanter-cans bledhen moy adhewedhes gans an Secùnd Jamys.