(151) Trelawny 2


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Syr Jonathan Trelawny o mab wydn Jowan Trelawny, an kensa baronet. Ev a veu genys in Pluw Nenyd pò Pelynt in cres an seytegves cansvledhen. Ev a veu deskys in Resohen le mayth o va scolor brâs. Myternyth pò ‘royalist’ fast o va. Ev a veu ornys prownter hag a’n jeva dyw bluw in Kernow. In mil whegh can eth deg pymp y feu va sacrys Epscop Brystô. Teyr bledhen warlergh hedna an mytern, an Secùnd Jamys, a dhyllas Declaracyon a Indùljens, ow ry franchys crejyans in Pow an Sowson. An declaracyon a remôvyas an lahys warbydn Catholygyon ha bagasow erel nag o esely a’n Eglos Establyshys. Anglycans in Pow an Sowson o fast warbydn an declaracyon. Y a welas nag o ma’s an kensa stap in avauncyans Catholygieth Roman, crejyans an mytern saw crejyans nag o kerys gans moyhariv y sojetys. Secùnd, nyns o lymyt vëth settys dhe grejyans i’n declaracyon, hag ytho y fia crejyans vëth alowys, paganieth comprehendys. Tressa Anglycans a sconyas an declaracyon dre rêson ev dhe revôkya an lahys gwrës gans parlement, hag y a gresy na’n jeva an mytern an gwir dhe gemeres dhodho y honen an gallos-na. Termyn cot warbydn dyllans an declaracyon William Sancroft, arghepscop Kergynt, Jonathan Trelawny, epscop Brystô ha whegh epscop aral a settyas dhyrag an mytern lyther a leverys na yllens acordya gans an declaracyon. An mytern a gonsydras aga derivas dhe vos lîbel ha rebellyans. An epscobow a veu dalhednys ha prysonys in Tour Loundres. Pàn dheuthons dhyrag an gort, bytegyns, y a veu kefys inocent. Trial an epscobow a wharva in mis Meheven mil whegh cans eth deg eth. In mis Du an keth bledhen parlement a elwys Wyllyam Orenj dhe Vreten Veur avell mytern. Ev a dheuth gans lu lystry brâs. Rêwl Jamys a godhas dhe dybmyn ha Jamys y honen a fias. I’n nessa bledhen, in mesk taclow erel, parlement a bassyas Act Gwiryow—neb a lymytyas power an mytern. In y raglavar dh’y gramer Kenowek in Archaeologia Britannica yma Edward Lhuyd ow qwil mencyon a Syr Jonathan Trelawny hag ev a’n gelow Epscop Keresk. An epscobeth-na o avauncyans dhyworth Brystô dell hevel, ha rës veu dhodho gans an mytern nowyth dre rêson a’y scodhyans warbydn Jamys. Pàn wrug Richard Hawker screfa Cân Tus an West i’n nawnjegves cansvledhen ev a gresys an Trelawny in cov an bobel dhe vos Jonathan Trelawny, adar y sîra wydn Jowan Trelawny. Pelha yth hevel fatell gemeras ev an lînednow ‘Here’s twenty thousand Cornishmen will know the reason why’ in mes a gân henwys ‘Come all ye jolly tinner boys’ neb a veu screfys orth dallath an nawnjegves cansvledhen warbydn an Frankyon.

Bysy yw dhybm leverel moy ow tùchya Hawker nessa seythen.


Nôten: Richard Hawker yw errour. Y hanow besyth o Robert.