(152) Hawker, Prownter Morwena


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Robert Hawker a veu genys in Plymoth orth dallath an nawnjegves cansvledhen. Pàn o va whath isgradhek in Resohen, ev a dhemedhas Elîza, benyn moy ès ugans bledhen cotha agesso y honen. Y a spênas aga mis mel in Din Kernowyon pò Tintagel. An tyller-na, dell hevel, a sordyas y les in whedhlow adro dhe Arthùr Mytern; ha lies bledhen moy adhewedhes ev a screfas bardhonek hir settys in Din Kernowyon in dadn an tîtel ‘The Quest of the Sangraal.’ John Betjeman a jùjyas an brydydhieth-na dhe vos gwell ès gwersyow Tennyson adro dhe’n keth mater. Hawker a veu ornys hag i’n vledhen mil eth cans try deg peswar ev a veu gwrës prownter Morwena in North a Gernow. Ev a remainyas ena remnant y vêwnans. Pan verwys Elîza ha hy peswar ugans bloodh ev a screfas ‘Dres dewgans bledhen ogasty ny veuma pymp nos dhyworty ha lebmyn otta vy in desolacyon.’ Dell hevel ny dhuryas y dhyspêr re hir: pàn o va try ugans bloodh ev a dhemedhas Polakes yonk, ugans bloodh, hag y feu teyr myrgh genys dhodhans. Ev o an kensa prownter dhe sensy gool drevas pò ‘harvest festival’ rag ry grassow dhe Dhuw a larjes an dor. Cas o ganso system an treven whel pò ‘workhouses’ rag y dhe shyndya teyluyow. Ev o dywysyk ow conys y vargen tir y honen hag a scodhya an vohosogyon warbydn tiogow rych. Pàn wrella marners merwel in torrva lester, pobel gebmyn a wre aga encledhyas wàr an treth pò gasa an corfow i’n mor. Ûsadow Hawker o dhe ry encledhyas Cristyon dhodhans. Hawker a’n jeva hanow avell den coynt pò ‘eccentric’. Yth yw leverys pàn nag o va ma’s maw ev a wyscas y honen in goubman heb ken dyllas vëth hag esedha wàr garygy Bud pò Bude ow cana hag ow crîba y vlew. Lies huny a gresys ev dhe vos morvoren. Ny blêkya gwysk du an prownter dhodho hag ytho y dhyllas o blou hag a lyw plùmen. An udn dra dhu adro dhodho a vedha y hosanow. Ev a vyldyas crow a bredn dryftys ragtho y honen esa ow meras dres an mor. Ena ev a wre screfa y lytherow ha’y vardhonegow. Hawker o kevrînyas pò ‘mystic,’ tra yw yw dhe weles yn cler in y brydydhieth. Hawker a screfas ‘Cân Tus an West’ pò ‘Trelawny’ pàn nag o va ma’s onen warn ugans bloodh. An gân a veu dyllys heb hanow. Inhy yma Hawker ow kemysky warbarth dew dhen henwys Trelawny hag owth ûsya lînednow in mes a gân warbydn Napoleon Bonaparte. Yth yw ‘Trelawny’ an gwelha aswonys a oll gwersyow Hawker hag yma hy ow servya rag fastya y gov:

Gans cledha dâ ha dorn yw lel,

Gwir-lowen an golon—

Yth aswon Mytern Jamys fel

Pandr’ wrello Kernowyon.