(155) Constentyn


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma an hanow Latyn Constantinus ‘Constantine’ owth apperya in Kernowek avell Costentyn hag in Kembrek avell Cystennin. I’n tradycyon Brethonek yth yw kefys try ferson a bris brâs neb a’s teva an hanow Costentyn, ha nyns yw êsy decernya intredhans. An kensa o Costentyn Meur pò ‘Constantine the Great.’ Ev a veu genys adro dhe’n vledhen dew cans seyth deg dew. Mab o va dhe Constantius, offycer Roman. Y das a veu gwrës les-emprour an West hag a’n somonas dhe Vreten Veur dhe omlath ragtho. Pàn verwys y das orth dallath an peswora cansvledhen, soudoryon Costentyn i’n Evrok a’n declaryas chif-emprour an West. Warlergh fetha an emprours Licinius ha Maxentius, Costentyn a veu an rêwlyas udnyk i’n West hag i’n Ÿst kefrës. Costentyn Meur yw caracter in gwary Kernowek Bêwnans Meryasek. I’n gwary yth yw Costentyn troblys gans cleves uthyk wàr y grohen. Yma y vedhygyon ow comendya dhodho golhy y honen i’n goos a lies flogh inocent. Ny yll ev gans conscyans dâ ladha an flehes ha gwell yw ganso godhevel ès bos cruel. Dre verkyl ev yw yaghhës gans Duw hag ytho yma va ow comondya oll pobel an Empîr dhe wordhya an Arlùth Jesu Crist. An secùnd den brâs gelwys Costentyn o jeneral in lu Honoryùs, an emprour Roman. An Costentyn-na i’n vledhen peswar cans ha seyth a dheclaryas y honen in Breten Veur dhe vos Emprour a’n West. Ev êth dhe Vrâstir Ewrop ha warlergh omlath gans lu an Emprour Honoryùs, Honoryùs a agrias dh’y wil kes-Emprour ganso y honen. Tus Breten Veur a drailyas warbydn Costentyn bytegyns ha pelha y luyow a veu fethys gans an trîbys Jerman esa ow tos in nùmbers brâs aberth i’n Empîr. Wàr an dyweth Costentyn a veu ledhys gans Honoryùs i’n vledhen peswar cans hag udnek. An Costentyn-na yw aswonys traweythyow avell Costentyn Breten. Jeffry Menow a wrug kemysky Costentyn Breten gans Costentyn Meur. Pelha Jeffry a lever fatell o try mab dhe Constentyn Breten, hèn yw Constans, Aurelius Ambrosius hag Uther Pendragon, tas Arthùr Mytern. Desmygyans pur yw an manylyon-na ow tùchya mebyon Costentyn Breten. An tressa Costentyn yw leverys dhe vos mytern Dewnan pò Dumnonia orth dyweth an wheffes cansvledhen. Ev o avoutrer ha denledhyas. Derivys yw inwedh ev dhe gemeres edrega a’y behosow, forsâkya y wlascor ha dewedha y vêwnans avell managh sans. Dell hevel ev a alsa bos an person campollys in hanow an bluw Langostentyn in West a Gernow.