(159) Edwin Norris


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma kenyver onen owth acordya fatell veu Henry Jenner gans y Handbook, dyllys i’n vledhen mil naw cans ha peswar, ev neb a dhalathas an dasserghyans Kernowek. Saw ny alsa Jenner screfa an lyver-na na ve an ober gwrÿs gans scoloryon erel a dheuth dhyragtho. In mesk an re-na ny a yll compla Edwin Norris, Whitley Stokes, Robert Williams, Joseph Loth ha Frederic Jago. I’n seythednow usy ow tos me a vydn tôwlel golok got orth oll an re-na hag orth an whel a wrussons y rag an tavas Kernowek. Hedhyw me a vydn leverel neb tra ow tùchya Edwin Norris. Ev a veu genys in Taunton, Gwlas an Hâv, orth dyweth an êtegves cansvledhen. Y feu va deskys in scol i’n tyller-na hag avell den yonk ev a spênas termyn in Frynk hag Italy avell descador pryveth in teylu Sowsnek. I’n termyn-na ev a dhescas Frynkek, Italyan, Armênyan ha Grêca Modern. Pàn dhewhelys ev dhe Bow an Sowson, yth o ev arfedhys dres nebes bledhydnyow in Loundres gans Cowethas an Eyndaow Ÿst. Saw Norris a omdednas dhyworth an soodh-na hag a veu gwrÿs is-scryvynyas a’n Gowethas Rial Âsyan. Norris a remainyas gans an gowethas-na remnant y dhedhyow. Ev a dal bos remembrys spessly avell Assyryologyth pò ‘Assyriologist’, rag ev o onen an kensa tus dhe dhesmygy gednscrefa pò ‘cuneiform writing’. Ev a dhyllas teyr radn a’y Erlyver Assyryan, kyn na vêwas ev dh’y gollenwel. Warbarth gans y ober wàr davas Assyrya, ev a dhescas meur a davosow Afrycan kefrÿs. An kensa ober adro dhe’n mater-ma a wrug ev dyllo a veu Outlines of a Vocabulary of a few of the principal Languages of Western and Central Africa, lyver a omdhysqwedhas i’n vledhen mil eth cans peswar deg onen. Y ober moyha a bris ow tùchya an Kernowek yw y dhyllans a dry gwary an Ordinalia in mes a’n dornscrif gwethys in Resohen. An ober o entîtùlys Ancient Cornish Drama ha dyllys veu in dyw gevrol gans Gwask Ûnyversyta Resohen i’n vledhen mil eth cans hanter-cans naw. An dhew lyver a veu daspryntys i’n bledhydnyow try ugans a’n gansvledhen dhewetha hag arta i’n gansvledhen-ma. Golegyans Norris a’n Ordinalia a dhalathas an studhyans academek a’n textow Kernowek. I’n secùnd kevrol a’y dhyllans Norris a bryntyas versyon a Erva an Kernowek Coth ha, moy a bris, ‘Sketch of Cornish Grammar.’ Kynth ywa growndys yn tien ogasty wàr yêth try gwary an Ordinalia, gramer cot Norris a servyas avell templet rag scoloryon erel a dheuth wàr y lergh. Apert yw rag ensampyl fatell wrug Henry Jenner devnyth anodho in y Dhornlyver. Ûnyversyta Bonn in Jermany a ros doctourieth onour dhe Norris rag oll y ober scolheygus. Ev a verwys i’n vledhen mil eth cans seyth deg dew.