© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Whitley Stokes o onen a scoloryon vrâssa an tavosow Keltek i’n nawnjegves cansvledhen. Ev a veu genys in Dulyn, Wordhen i’n vledhen mil eth cans deg warn ugans. Stokes a gafas y dhyscans in Coljy an Drynjys, Dulyn, le mayth o pendescador y das. Warlergh gradhegy ev a studhyas laha hag a veu gwrÿs dadhlor pò ‘barrister.’ Ev a bractycyas an galow-na in Loundres rag prës, ernag êth ev dhe Eynda in bledhydnyow try ugans an nawnjegves cansvledhen. In Eynda ev a’n jeva moy ès udn soodh sodhogyl. Ev a veu gelwys dhe gonsel an lesruw pò ‘viceroy’ hag ena ev a arrayas côdys laha Eynda, laha dynasak pò ‘civil law’, ha laha trespassek pò ‘criminal law’. In Eynda Stokes a dhemedhas benyn henwys Mary Bazely hag y feu peswar mab ha dyw vyrgh genys dhodhans. Y venyn a verwys in Eynda ha Whitley pàn dhewhelys dhe Loundres, a dhemedhas arta gans benyn henwys Elizabeth Temple. Ev a remainyas in Loundres remnant y dhedhyow. Stokes a wodhya Godhalek abàn veu va studhyor in Dulyn, kyn na dhescas ev bythqweth dhe gôwsel an tavas arnowyth. Ev a wrug whel a bris ow tùchya Godhalek Coth ha Godhalek Cres. Pelha Stokes o kesoberor an Jerman Ernst Windisch ow tylla an cùntellyans Irische Texte ‘Textow Godhalek’, neb a dheuth in mes i’n vledhen mil eth cans naw deg onen. A bris kefrës o y ober rag an tavas Kernowek. Ev a dharbaras an kensa dylansow academek a Passyon agan Arlùth, Creacyon an Bÿs ha Bêwnans Meryasek. An try lyver-na a dheuth in mes inter mil eth cans whegh deg ha mil eth cans seyth deg dew. Gans y gothman, an Jerman Kuno Meyer, Stokes a fùndyas an jornal academek Archiv für Celtische Lexikographie ‘Covscrif rag Geryadorieth Keltek.’ Y feu teyr hevrol dyllys. In mesk an artyclys screfys gans Stokes rag an kensa kevrol yth esa: rol a henwyn plansow Kembrek, versyons a deyr gerva goth in Godhalek ha rol a redyansow dyvers i’n text Bretonek Cartùlary Kemperle. A les specyal dhe Gernowegoryon i’n kensa kevrol yw an artyclys-ma gans Stokes: ‘Gerva dhe Bêwnans Meryasek’, hag ‘Amendyansow dhe dhyllans Edwin Norris a’n Ordinalia’. Stokes a screfas taclow i’n nessa dyw gevrol a’n Archiv saw nyns eus onen vëth anodhans ow pertainya dhe’n tavas Kernowek. Mater a varth ywa fatell wrug Stokes kebmys ober in y vêwnans. Yth yw leverys y whre va radn vrâs a’y whel in y gabyn wàr an gorhal wàr an trumach hir inter Loundres hag Eynda. Stokes a veu gwrës Coweth a Ordyr Eynda in mil eth cans eth deg naw. Ev a verwys in Loundres in mil naw cans naw hag y feu va encledhys in Corlan Goth Paddington.