(161) Joseph Loth


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a garsa hedhyw leverel neb tra ow tùchya Joseph Loth. Y hanow teylu yw spellys L-O-T-H. Joseph Loth a wrug meur rag an tavas Bretonek ha rag an Kernowek kefrës. Ev a veu genys i’n vledhen mil eth cans peswar deg seyth in Morbihan, tamall dhe’n West a Pontivy. Cowsor genesyk Bretonek o va. Y feu va gwrÿs descador in Pontivy hag a dhescas in tyleryow dyvers. Warlergh an Gwerryans Frank-Prùssyan ev a dhescas in scolyow dyffrans in Parys hag ev a vetyas ena an scolor brâs, Henri d’Arbois de Jubainville, neb a inias Loth dhe studhya an tavosow Keltek. Loth a fùndyas an jornal Annales de Bretagne hag a veu an golegyth dres lies bledhen. Ev a whythras omlêsans an Bretonek i’n Frynk i’n termyn eus passys, ha’n finweth istorek pelha dhe’n ÿst a Vretonek côwsys yw aswonys whath avell ‘lînen Loth’. Ev o esel a Gesasran an Artys in Ûnyversyta Rennes dres termyn hir. Loth a dhyllas lies artykyl ow tùchya an Bretonek i’n jornal Revue Celtique hag ev a drailyas an Mabynogyon dhyworth Kembrek dhe Frynkek. Onen a’y lyfrow a bris yw analîsans a’n geryow Latyn in Kembrek, Bretonek ha Kernowek, a dhyllas ev in mil eth cans naw deg dew. Henry Lewis a got’has an lyver-na ha’y dhyllo in Kembrek hanter-cans bledhen wosa hedna. An Kernowek Dewedhes o a les arbednyk dhe Loth. In Revue Celtique rag ensampyl Loth a worras in mes an kensa dyllans a drailyansow Kernowek Wella Kerew dhyworth Jenesys hag Awayl Mathew. In Archiv für Celtische Lexicographie ev a dhyllas an kescows Kernowek in mes a Introduction to Knowledge gans Andrew Borde ha versyon a lyther William Bodinar. Nyns o tybyansow Loth ewn pùpprës. In artykyl aral dyllys ganso in Revue Celtique yma Loth ow tyghtya an qwestyon a’n varyans inter ha g gwelys i’n textow Kernowek, rag ensampyl in wosa ha woja, pesy ha pejy, gallosek ha gallogek. Loth a gresy fatell esa i’n geryow-na son nag o naneyl s na g, saw neb tra intredhans. Nyns o gwir tybyans Loth, saw in bledhydnyow peswar ugans an gansvledhen dhewetha y feu va degemerys yn tywysyk gans certan Kernowegoryon. An dus-na a adoptyas spellyansow gans dj ha tj rag kes-sonyow desmygys Loth. Ytho y feu comendys geryow kepar ha *gantjo ‘with him’, *boluntjedh ‘wish’, ha *kerentja ‘love’, y oll lytherednys gans tj. I’n gwelha prës nyns o cales dysqwedhes fatell o an formys-na myskemerys hag y a veu remôvys dhyworth an tavas. Awos an errour-na Loth o onen a’n brâssa scoloryon bythqweth a veu in Breten Vian. Ev a recêvas Doctourieth Lien Onour in Ûnyversyta Glasgow in mil naw cans hag onen hag ev a verwys i’n vledhen mil naw cans try deg peswar. Doue d’e bardono! Cres Duw dh’y enef!