(164) 'China' in Kernowek


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An Grêkys coth a wodhya adro dhe’n pow yw gelwys ‘China’ genen in Sowsnek. Y a wre decernya inter dyw radn a’n pow. Genesygyon i’n north a’n pow y a elwy Sêres ha’ga fow o Sêryca. Yma an ger Sêryca ow ry ‘silk’ in Sowsnek, rag wostallath ‘silk’ (owrlyn) o aswonys avell padn dhyworth China. Yth o pobel in soth an pow aswonys dhe’n Grêkys avell Sînay ha’ga fow o Sîna. Y feu an form-na benthygys avell Sîna gans an Romans. Yth yw an element-na gwelys in Sowsnek in rag-gorrans Sino-, rag ensampyl in henwyn gwadn dewblek kepar ha ‘Sino-Tibetan,’ ‘Sino-American,’ h.e. An hanow kebmyn in agan dedhyow-ny heb mar yw China. Dell hevel yth yw China a dhevedhyans Sanscryt hag yma va ow tos, dell yw cresys gans an radn vrâssa a scoloryon, dhyworth an Teylu Rial Qin; y o an emprours neb a wrug udnya China i’n tressa cansvledhen dhyrag Crist. Yth yw apert inwedh na dheuth an hanow-na aberth in Sowsnek bys i’n whêtegves cansvledhen. Kina yw form aral a China kefys in tavosow erel in Ewrop. Nyns yw certan mars eus colm vëth inter an formys Sîna in Grêk Coth ha China, Kina. An henwyn rag China i’n tavosow Keltek yw a les: Yma radn anodhans owth ûsya formys growdnys wàr Sina in Latyn. In Godhalek Wordhen China yw an tSín. In Scot-Godhalek China yw Sìona. Yma an Vretonyon ow leverel SinaBro-Sina. Wàr an tenewen aral yma an Gembrion ow sewya an Sowson ow tùchya dysplêgyans an vogalen cres, rag aga hanow y yw Tsieina. Yma an gerlyver Kernowek wàr lînen ow comendya China avell hanow an pow. An ger chînî ‘porslen dhyworth China’ yw a dhevedhyans Persyan hag yth o va kebmyn in Eynda ha’n powyow adro. Y feu va drÿs dhe Bow an Sowson i’n seytegves cansvledhen. Yma formys kepar ha cheeny, cheany ‘earthenware’ kefys whath in ranyêthow in Pow an Sowson hag in Kernow. Yma cheeny, cheany in certan tyleryow ow styrya China, hèn yw an pow y honen. Rag hedna yma Richard Gendall owth ûsya Cheany avell hanow an pow. Dell leverys vy obma warleny, an ger cotha in Kernowek dasvewys rag China yw Cathay, screfys gans Caradar in y versyon Kernowek a viajys an Broder Odryk, trailyans dhyworth Kembrek an Osow Cres, neb o dyllys in bledhydnow try ugans an gansvledhen dhewetha. Cattay, Cathay o hanow kebmyn China pàn esa an pow in dadn an Mongols. Cathay yw kefys whath in hanow an gowethas neyja Cathay Pacific, usy hy fednplâss in Hong Kong. Cathay yw ow hanow preferrys vy rag ‘China;’ pelha mar teun ny ha’y ûsya, ny a vëdh in company dâ, rag lies a’n poblow Slavek, pàn wrellons y referrya dhe ‘China’, y a lever Kitai.