(168) Ysolt, Esyllt


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Kenyver Kernowegor re glôwas a Isolt, carores anfusyk Trystan. Meur ahanan re redyas an bardhonek hir screfys gans Caradar in bledhdynyow dew ugans ha dyllys in y gov gans y wedhowes i’n vledhen mil naw cans hanter cans onen. An bardhonek a veu dyllys arta i’n vledhen. dew vil ha deg gans Gwask an Orlewen, hèn yw gans Eddie Climo yw tremenys. Trystan hag Isolt in gwersyow Kernowek a veu growndys war versyon Hilaire Bellocm a’n text gorrys warbarth gans Joseph Bédier dhyworth penfentydnyow dyffrans in Frynkek Cres. I’n dedhyow coth yth esa pobel ow cresy fatell veu an hanow Isolt growndys wàr an dhyw wredhen in Almaynek an Osow Cres is ‘rew, yey’, Sowsnek ‘ice’ ha hiltya ‘battle. Nyns yw an styryans-na lyckly dhe vos gwir. An hanow Isolt in y devedhyans yw Keltek pur. Pelha nyns o Isolt carores Trystan an udn venyn o an hanow-na dhedhy. In Trystan hag Isolt yma Trystan ow kemeres avell gwreg benyn henwys Isolt saw nyns yw hy Isolt an tîtel. Gwreg Tristan i’n whedhel yw gelwys Isolt an Dhywla Wynn ‘Isolt of the White Hands’. Yma radn pymthek a vardhonek Caradar ow ry acownt a’n venyn-na. Kyn feu an whedhel trailys gans Caradar dhyworth version Frynkek., y feu an story dell hevel screfys wostallath in Kembrek. Dre lycklod hanow gwreg Tristan in Kembrek o Isolt Meinwen, hèn yw dhe styrya ‘Isolt cul ha gwydn’, ‘Isolt cul  ha teg.’ Y feu Meinwen hanter-trailys dhe Frynkek ha’n ger mein ‘cul, mon; narrow’ a veu kemerys gans an Frynkegoryon avell mains ‘dywla; hands’. Ha dhyworth hedna y teuth ‘Iseult aux Blanches Mains’ in Frynkek  hag Isolt an Dhywla Wydn ‘Isolt of the White Hands’ in trailyans Caradar. Kebmyn yw an hanow Isolt in lien an Gembrion. In aghscrifow po ‘genealogies’ an Gembrion goth yma an hanow Isolt owth omdhysqwedhes in form aral Etthil. In Kembrek moy adhewedhes bytegyns an hanow, dell yw ûsys, yw Esyllt. An pendescador Kenneth Jackson a gomendyas fatell ylly Esyllt bos kelmys gans an verb syllu ‘dhe veras; to look’ in Kembrek ha sellout ‘dhe veras; to look’ in Bretonek. Mars yw hedna gwir, nena form wredhek an hanow o Adsiltia ‘an venyn usy tus ow meras orty’, ow referrya dh’y thecter brâs. Ny a wor inwedh fatell o an hanow aswonys in Kernow an Osow Cres avarr. In chartour Saxon dhyworth Kernow screfys i’n vledhen naw cans whegh deg seyth y hyll bos redys an hanow tyller hryt Eselt ‘res Eselt, Eselt’s ford’. In Kernowek Cres an hanow Eselt a via *Esels. Assa via dâ gweles neb jorna versyon nowyth a whedhel an dhew garor screfys in gwersyow Kernowek in dadn an titel Tristan hag Esels.