(170) 'Pub' in Kernowek


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In gerlyver wàr lînen an Academy Kernowek an ger rÿs rag ‘pub, tavern’ yw dywotty. Y feu an ger-na kemerys dhyworth gerlyver Kernowek-Sowsnek an vledhen mil naw cans try deg eth, le mayth usy Nance ow comendya dewotty ‘alehouse’ gans e avell an kensa vogalenAn ger-na a veu desmygys gans Nance y honen wàr batron an ger Kembrek dioty ‘pub, alehouse.’ In gerlyver Sowsnek-Kernowek moy adhewedhes yma Nance whath ow comendya dewotty. Bysy yw dhyn remembra bytegyns nag yw an ger dewotty kefys in Kernowek tradycyonal in tyller vëth. An ger rag ‘pub, alehouse’ in Kernowek yw tavern. In Bêwnans Meryasek an oberwas a lever:

i’n tavern sur owth eva

ymowns pòr rudh aga min

‘they indeed are drinking

in the pub and their mouths are very red.’

Pelha yma Lhuyd ow ry tavarn ha chy tavarn rag ‘alehouse, tavern.’ Nance a wodhya heb mar adro dhe’n ger tavern, rag yth yw tavern an udn ger rag ‘pub’ in y kensa gerlyver Sowsnek-Kernowek dyllys in mil naw cans try deg peswar. Warlergh an termyn-na yth hevel fatell esa Nance ow preferrya dewotty dhe tavern dre rêson tavern the vos re haval dhe ‘tavern’ in Sowsnek. Nance êth ytho dhe Gembrek rag cafos ger moy Keltek. Geseth pò ‘irony’ yw bytegyns bos tafarn ‘tavern’ ha ty tafarn ‘chy tavern’ an geryow ûsys in Kembrek rag ‘pub, alehouse.’ Moy kebmyn yw tafarn in Kembrek ès an ger dioty, mayth yw dewotty in Kernowek growndys warnodho. Rag ensampyl yma bardhonek aswonys dâ gans an prydyth, Dafydd ap Gwilym henwys Trafferth mewn Tafarn ‘Deray in Tavern.’ In Geiriadur Prifysgol Cymru yma an exampyl dewetha a’n ger dioty ow tos dhyworth dyweth an êtegves cansvledhen. Saw ow tùchya an ger tafarn an gerlyver Kembrek a lever y vos ar lafar, hèn yw ‘côwsys’; yma an Gembrion  whath owth ûsya an ger tafarn. Rag hedna ny a wel nag eus skyla vëth rag gwil devnyth a’n ger dewotty. An ger Kernowek rag ‘alehouse, pub’ yw tavern. Herwyth Lhuyd yth yw tavern an ger rag ‘alehouse’ in Kernowek hag in Bretonek kefrÿs. Pelha Lhuyd i’n keth tyller a re an ger hostleri avell ken hanow Bretonek rag tavern. Yth yw an ger ostaleri, ostaliri kefys whath in Bretonek rag an styr ‘auberge; barr rag dewas medhow.’ Hostleri a veu kemerys dhyworth Lhuyd gans Pryce ha Borlase avell Kernowek gans an styr ‘inn, alehouse’. In gwiryoneth hostleri yw Bretonek; nyns ywa Kernowek. An Kernowek rag ‘pub, alehouse’ yw tavern. Hostleri yw Bretonek. Dewotty wàr an tenewen aral yw desmygyans pur ha rag hedna gwell via heb y ûsya.