(181) An Balores


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Miguel de Cervantes, an screfor Spaynek, a veu genys in cres an whêtegves cansvledhen in Alcalá de Henares ogas lowr dhe Madrid. Y lyver Don Quixote, dyllys i’n vledhen mil whegh cans ha pymthek, yw aswonys avell y vrâssa scrif hag inwedh avell an kensa novel arnowyth in tavas vëth. An lyver-na yw an whedhel a dhen nôbyl a redyas mar lies lyver a jevalry may whrug ev muskegy. Yma va porposys dhe wil dhe jevalry dasvewa, kyn nag yw chevalry practycys na felha in y bow. Rag hedna yma va ow mos alês avell marhak gwandra pò ‘knight errant,’ ev wàr y vargh Rocinante ha’y sqwier Sancho Panza wàr y asen. I’n lyver in mesk lies tra aral yma Don Quixote ow metya bagas bugeleth hag ow tebâtya gansans ow tùchya chevalry. In aga hescows Don Quixote a lever hebma: A ny wrussowgh why redya cronyclys Pow an Sowson, le may ma derivys gwythresow henwys brâs Mytern Arthùr? Yma tradycyon kebmyn coth in oll gwlascor Breten Veur na wrug an mytern-na merwel bythqweth. In contrary part dre bystry ev a veu gwrës bran dhu, ha pàn vo tremenys lowr a dermyn, ev a dâl dewheles ha dascafos y wlascor ha’y welen rial. Dre rêson a hedna dhyworth an dedhyow-na bys i’n jëdh hedhyw ny wrug Sows vÿth ladha bran dhu vÿth. Dell hevel nyns eus ha ny veu crejyans vëth in Kernow dhe gelmy Arthùr Mytern gans an vran dhu. Saw yth yw Arthùr kelmys gans an balores pò ‘Cornish chough’ (Pyrrhocorax pyrrhocorax). An edhen-na yw esel a deylu an Corvidae hag yth yw an vran dhu esel a’n keth teylu. In Kernow yth o leverys fatell veu Arthùr Mytern trailys dhe balores. Pelha gelvyn rudh ha garrow rudh an edhen o cresys dhe vos arwedhyow a’n goos scùllys in batel dhewetha Mytern Arthùr warbydn Modres traitour. Dyfennys o dhe bùb Kernow ladha an balores. Yth yw an balores aswonys avell edhen kenedhlek Kernow. Rag ensampyl yth yw hy dhe weles a-ugh scochon heraldek Kernow hag y feu an edhen dôwysys rag arweth Kefrysyans Cowethasow Kernow Goth pò ‘Federation of Old Cornwall Societies’, heb mar warbarth gans an lavar coth Nyns yw marow Mytern Arthùr. Dell hevel yth o an balores gyllys yn tien mes a Gernow warbydn dyweth an nawnjegves cansvledhen, kynth o an edhen kefys whath in nebes tyleryow in Kembra, in Scotlond hag in Wordhen. In Kembra hag in Scotlond an balores in Sowsnek a vedha gelwys ‘an vran a Gernow.’ Nyns yw cales ytho gweles prag y whrug Cervantes kemysky an balores gans an vran. Kynth o an balores gyllys mes a Gernow, i’n vledhen dyw vil yth hevel fatell veu an balores gwelys in Kernow arta. Ny wrug Arthùr Mytern dewheles in person, martesen, saw i’n vilvledhen nowyth-ma otta va dewhelys dhe Gernow in fygùr an balores. Coynt lowr yth yw Spayn an udn pow in Ewrop mayth yw kebmyn an balores.