(195) Sen Nyclas


© 2019 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Ny wodhon ny nameur ow tùchya Sen Nyclas. Warlergh an tradycyon ev a veu genys i’n vledhen dew cans ha seyth deg in Patara i’n soth-ÿst a Âsya Vian (Tùrky hedhyw). Y gerens o Cristonyon rych hag ev a veu ornys prownter. Pàn verwys y das ha’y vabm, dell yw leverys, Nyclas a radnas y bÿth in mesk an vohosogyon. Nyclas a glôwas a dhen neb a’n jeva teyr myrgh. Dre veschauns an den a gollas oll y vona ha rag hedna ny ylly ev ry argovrow pò ‘dowries’ dh’y vyrhas. An mowysy ytho a vynsa remainya heb demedhy ha dre lycklod, awos an lack a begans aral, y a via constrînys dhe vos hôrys. Nyclas a erviras aga gweres saw poos o ganso shâmya aga thas dre ry mona cheryta dhodho. Rag hedna ev a dheuth dhe’n chy teyr nos wosa hy ben ha tôwlel pors a vathow owr ajy der an fenester. Yth yw ken whedhel derivys adro dhe Nyclas. Leverys yw ev dhe vysytya an Pow Sans, saw pàn esa ev i’n gorhal wàr an viaj, hager-awel uthyk a sordyas. Nyclas a savas in bàn ha rebukya an todnow. Dystowgh an gwyns a wrug lehe. Dre rêson a’n gweres a ros Nyclas dhe’n teyr myrgh, ev a veu gwrës an sans tasek a flehes, hag awos ev dhe goselhe an hager-awel, ev yw consydrys an sans tasek a varners. Warlergh vysytya an Pow Sans Nyclas a dhewhelys dhe Myra (Demre hedhyw). in Âsya Vian. Epscop an cyta a verwys termyn cot dhyrag hedna ha’n brontyryon a dhetermyas gwil epscop a’n kensa prownter dhe entra i’n eglos an myttyn-na. Nyclas a veu an prownter hag indelha ev a veu gwrës epscop Myra. Pàn o va epscop y feu sensys Consel Nîss (‘Nicea’) rag debâtya qwestyon an Drynjys Sans. Yth yw leverys fatell gemeras Nyclas kebmys euth, pàn glôwas ev tybyansow onen a’n heretykys, may whrug ev y gronkya. An gwythres-na o achêson rag meth in mesk an ewngryjygyon ha rag hedna nyns yw Nyclas campollys in mesk epscobow an consel—kynth o va present. Dre vrâs yth o Nyclas meurgerys gans pobel y bow hag yn scon warlergh y vernans i’n vledhen try hans peswar deg dew y fedha meur a dhevôcyon dysqwedhys dhodho. Orth dallath an unegves cansvledhen an Tùrkys, neb o Mùslyms, a gemeras Myra dhyworth an Grêkys Cristyon. Nebes marners Italyan a sêsyas creryow pò ‘relics’ Nyclas in Myra ha’ga dry dhe Bari in soth a Italy. Presens eskern Sen Nyclas in Italy a wrug dhe dhevôcyon dhe’n sans omlêsa dres oll an west a Ewrop. Y dhegol yw dëdh y vernans, an wheffes dëdh a vis Kevardhu. I’n Iseldiryow Sen Nyclas yw gelwys Sinterklaas, ha degol Sen Nyclas yma den dôwysys ha gwyskys in dyllas rudh dhe vos kepar ha Nyclas epscop. Yma va ow mos adro in udn ry royow dhe’n flehes. An epscop a’n jeves coweth, du y fâss, gelwys Pedyr Du. Ûsadow Peder yw dhe ry darnow glow in le a royow dhe’n flehes na wrug omdhon aga honen yn tâ i’n vledhen eus passys. Dell hevel y feu meur a dradycyons ow tùchya Sinterklaas drÿs gans pobel an Iseldiryow dh’aga gwlasva i’n Ameryca, Amsterdam Nowyth. Pàn gafas an Sowson an pow-na i’n seytegves cansvledhen, y a drailyas an hanow dhe Evrok Nowyth ‘New York.’ Meur a’n tradycyons a Sinterklaas a remainyas, kyn fowns y chaunjys nebes. An jëdh rag an sans dhe ry royow dhe’n flehes a veu dylâtys bys i’n Nadelyk y honen; pelha yma hanow an sans owth apperya in Sowsnek avell Santa Claus.