© 2014 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Me a veu in Newry agensow, tre in Conteth Down in Wordhen North. Yma Newry in epscobeth catholyk Dromore hag yma peneglos fest teg i’n dre. An beneglos-na a veu byldys i’n kensa hanter an nawnjegves cansvledhen ha sacrys yw dhe Colman, sans tasek Dromore. Ny woryn ny nameur a yllyn ny trestya dhodho ow tùchya Colman. Warlergh lyver y vêwnans bytegyns y feu va genys in north a Wordhen neb termyn in cres an wheghfes cansvledhen. Ev a fùndyas managhty i’n côstys-na ha wosa hedna mos wàr brierynsys dhe Rom, le may feu va consecrâtys epscop gans an Pab. Wàr y fordh wàr dhelergh dhe Wordhen, yth esa Colman in Breten Veur pàn wrug an vyternes don mab bian. Saw an mab o marow. Dre bejadow Colman an flogh a veu dasvêwys hag ev a devys in bàn dhe vos Dewy Sans, chif sans Kembra. Sacrys dhe Colman yw Llangolman ha Capel Colman in Conteth Penvro in Kembra. Nyns yw tyller vÿth kelmys gans Colman in Kernow dell hevel, saw yma nebes versow a les i’n gwary Kernowek Origo Mundi. I’n gwary yth yw Salamon, mytern Israel, whensys dhe vyldya templa dhe Dhuw in Jerùsalem. Rag hedna ev a ergh dh’y vessejer declarya dres an cyta bos res dhe oll carpentoryon ha masons dos heb let dhe’n mytern may fo dalethys an templa. An servont a lever:
Syr arlùth re Synt Gylmyn
me a wra dha worhemmyn
oll yn tien
hag a warn dhe vysterdens
avorow dhis may teffens
yn kettep penn.
Yma an ger mysterdens ow styrya creftoryon heb mar. Yma servont Salamon Mytern owth ûsya an lavar re Synt Gylmyn. An hanow Gylmyn, dell hevel, yw Kylmyn gans trailyans parhaus pò ‘permanent mutation’ wàr an kensa kesson. An form Colman in henwyn Kembrek kepar ha Llangolman yw an form lienek saw an hanow Latyn Colmanus ow tos der an Kernowek Coth a vynsa ry *Kelmyn pò *Kylmyn in Kernowek Cres. Yth hevel ytho fatell yw Colman Sans campollys unweyth dhe’n lyha in Kernowek. Dre rêson bos lies onen henwys Colman in mesk sens an eglos Keltek, ny yllyn ny leverel yn certan yw an sans campollys in Origo Mundi ha Colman dromore an keth den; ha pelha ny yllyn ny leverel prag y whra an person in gwary growndys wàr an Testament Coth campolla an sans Cristyon i’n kensa le. A pen ny abyl dhe wortheby an qwestyons-na, martesen ny a woffia moy adro de Colman (Kelmyn) hag adro dhe’n devôcyon dhodho in Kernow i’n Osow Cres. Saw an re-na yw maters a dal dhybm gasa dhe bobel erel.