(199) Strongbow


© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Richard de Clare a veu genys in Kynt in cres an dhewdhegves cansvledhen. Tas Richard o Yùrl Penvro in Kembra ha Richard a gafas an tîtel-na dhyworto pàn verwys y das. Les’hanow Richard o Arcfort in Frynkek, hèn yw dhe styrya Gwarek Grev. In Sowsnek dell yw ûsys yth yw Richard de Clare aswonys avell ‘Strongbow.’ Dermot MacMurrow, mytern Leinster in Wordhen, a vetyas gans Strongbow pàn dheuth Dermot dhe Bow an Sowson ow whelas gweres ow tascafos y wlascor. Dermot a gollas y diryow dhe uhelvytern Wordhen, Rory O’Conor, dre rêson Dermot dhe dhenladra gwreg mytern aral. Y feu acord gwrës inter Strongbow ha Dermot. Mar teffa Strongbow ha dos dhe Wordhen gans lu brâs rag gweres Dermot, ena Strongbow a alsa demedhy myrgh Dermot ha cafos gwlascor Leinster wosa mernans hy thas. Indelha Strongbow gans hùmbrynkysy Norman erel a dheuth dhe Wordhen ha cafos Leinster arta rag Dermot. An vledhen-na o mil udn cans whegh deg naw hag ena y talathas presens an Sowson in Wordhen. Strongbow a gafas an tiryow warlergh an acord a wrug ev gans Dermot, saw ev a hepcoras an trevow brâs ha’ga ry dhe vytern Pow an Sowson, an Secùnd Henry. Strongbow a veu encledhys in Peneglos an Drynsys in Dulyn, pò Eglos Crist dell yw hy gelwys. Hag yth o y vedh a ven dhe weles inhy. An bedh-na o a brow brâs rag ûsys o marchons Dulyn dos hag aqwytya dettoryon ha gwil ambosow erel dresto. I’n gwetha prÿs fùndacyon an beneglos a slynkyas i’n secùnd hanter an whêtegves cansvledhen ha’n fos soth a godhas dhe’n dor. Dystrêwys yn tien veu bedh Strongbow ha res o cafos bedh aral rag kemeres y le. Y feu bedh kefys in Drogheda ha settys in tyller an bedh dystrêwys. Y feu meur a’n beneglos dasterevys in secùnd hanter an nawdhegves* cansvledhen, saw yth yw an bedh dhyworth Drogheda dhe weles whath in tremenva soth an eglos. Men pedrak yw an bedh ha’n imach a varhak a’n osow cres ow crowedha ahës warnodho. Apert yw nag yw Strongbow an marhak rag nyns usy côta arvow Strongbow wàr y scoos, saw scochon aral yn tien. Bytegyns yma kenyver onen ow kelwel an bedh ‘Strongbow’s Tomb’ bys i’n jëdh hedhyw.

*Redyer nawnjegves