© 2014 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An Revront Ian Paisley a verwys an seythen dhewetha hag ev eth ha peswar ugans bloodh. Lebmyn yma an journalydhyon ha’n polytycyans ow leverel taclow teg adro dhodho, spessly bledhydnyow dewetha y resegva pàn o va kensa menyster in governans devolvys Wordhen North. Dâ yw martesen bytegyns perthy cov a’n part negedhek a’n jeva ev in gwlasegeth Wordhen dres lies bledhen kyns ès an termyn-na. Paisley a veu ordnys menyster Protestant selvenek pò ‘fundamentalist’ i’n bledhydnyow dew ugans ha nebes moy adhewedhes ev a fùndyas y eglos y honen, Eglos Brespytêryan Frank. Warlergh hedna ev a gôwsy yn fenowgh hag yn uhel warbydn an Eglos Catholyk Roman, warbydn êcûmenegeth ha warbydn practys kethreydhel. I’n bledhydnyow try ugans yth esa hùmbrynkyas an Unyansydhyon pò ‘Unionists’, Terence O’Neill, ow whelas lehe an contradians inter an dhyw gemeneth in North a Wordhen hag inter an dhyw radn a Wordhen, North ha Soth. Paisley a wrug keskerdh wàr y bydn. Res o dhe O’Neill gasa y soodh avell pednvenyster. Paisley a wrug an keth tra gans sewyas O’Neill, James Chichester Clark. Oll an termyn-na yth esa Paisley ow côwsel hag ow keskerdhes warbydn Môvyans Gwiryow Dynasek pò ‘Civil Rights Movement’ an Gatholygyon. I’n vledhen mil naw cans seyth deg peswar y feu sînys Acord Sùnningdale neb a ros governans kevradna gallos inter Protestans ha Catholygyon dhe Wordhen North. Paisley a gowsas yn crev wàr y bydn ha kemeres radn in Astel Ober an Leoutydhyon pò ‘Loyalist Strike’ neb a dhysevys an acord-na ha shyndya resegva Brian Faulkner. I’n bledhydnyow peswar ugans Pab Jowan Powl an Secùnd a gowsas orth Seneth Ewrop. Scant ny wrug ev dallath y areth, pàn grias Paisley in mes: ‘Yth esof orth dha acûsya dhe vos an Antecrist!’ Hag ev a veu tôwlys in mes a’n chambour. I’n vledhen mil naw cans naw deg eth y feu sînys Acord De Gwener an Grows, pò ‘Good Friday Agreement’ hag arta Wordhen North a gafas governans devolvys kevradna gallos. Paisley a geskerdhas warbydn hedna kefrÿs hag a spêdyas dhe wil dhe David Trimble kelly y soodh avell kensa menyster Wordhen North. Saw termyn cot wosa hedna stauns Paisley a hevelly medhelhe nebes. Wàr an dyweth i’n vledhen dyw vil ha seyth Paisley a veu gwrës kensa menyster Wordhen North in governans kevradna gallos gans Sinn Féin. Dres an part moy avarr a’y vêwnans Paisley a gôwsy in mes warbydn kes-assoylyans inter an dhyw gemeneth in Wordhen North. Ev a dhystrêwys resegva peswar den skentyl, deskys dâ ha temprys, Terence O’Neill, James Chichester Clark, Brian Faulkner ha David Trimble. Hag ena warbydn pùb govenek Paisley a wrug an very tra a wrug ev aga dampnya ragtho: kesassoylyans gans Catholygyon ha kevradna gallos in Wordhen North. Trueth yw na wrug omdhegyans Paisley medhelhe deg warn ugans bledhen pò dew ugans bledhen moy avarr.