(214) Mamoleth Benfyk


© 2014 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Câss laha meur y les a veu drës dhyrag lagasow an bobel in Wordhen agensow. Yma tregys obma copel yonk demedhys na ylly an venyn omdhon flogh dre rêson a dhysableth. Rag hedna y êth dhe whor an venyn ha’y fesy dhe wythresa dhedhans avell mabm benfyk pò ‘surrogate mother’. Oy froothushës pò ‘fertilised ovum’ a dhyworth an venyn ha’y gour a veu graffys in whor an wreg. Ena an whor a dhros an torras bys i’n termyn ewn hag a dhug gevellas yagh. Saw pàn whelas an copel covscrefa an dhyw enesygeth, y a gafas caletter. Certan o pyw o tas an dhew flogh saw pyw o aga mabm? An covscrefor a enesygethow a recordyas an gour avell tas an evellas saw ev a sconyas recordya avell mabm an venyn neb a brovias an oy, dre rêson nag o hy an venyn may feu an babiow genys dhedhy. An gour ha’y venyn a wrug appêl bys i’n uhelgort pò ‘high court’. An gort-na a dhetermyas an venyn may teuth an oy dhyworty dhe vos an vabm, saw ny veu an governans pÿs dâ gans an determyans-na. Y a dhros an câss dhe’n Gort Uhelha ‘the Supreme Court’ ha’n secùnd cort a leverys an venyn neb a dhug an babiow dhe vos aga mabm. Y a wrug an ervirans-na wàr an benrêwl: Mater semper certa est, hèn yw dhe styrya ‘Certan yw an vabm pùpprës’, rag hy yw an person may teu an baby pò babiow in mes anedhy. Mar pëdh alowys penfenten an oy dhe vos gelwys an wirvabm, ple fÿdh gesys an venyn neb a dhug an baby naw mis in hy thorr? Pyw a dal bos henwys avell mabm an baby wàr an testscrif genesygeth, ha pelha ywa ewn ha dhe les an bobel i’n kensa le ry cubmyas dhe broces a’n par-ma? I’n Wlascor Udnys mamoleth benfyk yw alowys wàr an ambos na wra an vabm benfyk recêva pêmont vÿth. Saw yma powyow erel, Fynlond, Pow Swyts ha Frynk, rag ensompel, le may ma mamoleth benfyk dyfednys yn tien, ny vern usy an vabm ow recêva pêmont pò nag usy. Governans Wordhen re bromyssyas rethyans pò ‘legislation’ rag i’n tor’-ma nyns eus laha vÿth in fors in Wordhen ow tùchya an mater-ma.