(215) Airborth Towan Plustry


© 2010 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a dheuth dhe Gernow agensow rag kemeres radn in Dëdh Tregedna in Eglos Hallow. Ass o dâ clappya Kernowek, metya gans cothmans coth ha gwil cothmans nowyth. Orth dyweth an gansvledhen dhewetha, pàn wrellen vy dos dhe Gernow dhyworth Wordhen, res vedha dhym neyja dhe Blymoth. Nyns o hens tira pò ‘runway’ an airborth-na hir lowr rag airednow arnowyth ha ny ylly an hens bos hirhës awos an airborth dhe vos in cres treven. Rag hedna airborth Plymoth a veu degës. An treveth-ma me a neyjyas dhe airborth Towan Plustry in Lanhernow pò ‘St Mawgan.’ Kynth yw byldyansow an airborth pòr vian, fest hir yw an hens tira. Kyns ès bos egerys yn avarr i’n gansvledhen-ma avell airborth dynasak pò ‘civilian,’ yth o an airborth gorsaf airednow ow longya dhe’n Airlu Rial. Awos an tyller dhe vos ûsys gans an airlu rag airednow brâs hag uskys, yth yw an hens tira fest hir. In gwir yth yw hens tira Towan Plustry onen a’n hensy hirra in oll an Wlascor Udnys. Yth ywa teyr mil mêter in hës, hèn yw hirra lowr ès udn vildir ha hanter. Me a neyjyas dhe Gernow ha tre arta try dëdh moy adhewedhes in airen ATR 72 (ATR Seyth Deg Dew). An jyn-na a veu byldys gans kesoberyans inter Airbùs in Frynk hag Alitalia in Italy. Yma an fygùr seyth deg dew i’n hanow ow referrya dhe nùmber an viajyoryon a yll bos degys i’n airen orth an udn prÿs. An jyn a’n jeves dew dùrbô-genworror pò ‘turboprops’ hag yth yw ûsys gans lies cowethyans rag viajyoryon, rag don cargow ha rag cresluyow ow patrollya costys. Yth yw hy martesen an airen preferrys dres oll an norvÿs rag carrya tremenysy wàr viajys cot. Dre rêson nag yw an airen re vrâs, lyckly yw hy dhe waya adro nebes ha hy owth ascendya pò ow skydnya, spessly mars usy an gwyns ow whetha yn crev. Yma an frobmans pò ‘turbulence’ ow lehe kepar dell usy an airen ow trehedhes y uhelder brâssa. Res yw avowa fatell veu moy ès udn airen ATR 72 (ATR Seyth Deg Dew) kevrednek in droglabmow. An droglabmow lacka a veu sordys in awel pòr yêyn dre rew wàr an eskelly. Rag assoylya an problem-na botas dyrewy pò ‘deicing boots’ re beu desedhys wàr an eskelly. Ytho mar pëdh an condycyons lyckly dhe sordya yey, an botas a wra whedhy ha terry an rew cales dhywar an eskelly. Nyns eus otham vëth a dhyrewy a’n par-na wàr styfairednow pò ‘jet planes’, rag yma an jynys-na owth ûsya system a dobmans rag gwetha an eskelly cler a rew. Heb mar ny veu problem vëth a rew genen ny wàr agan neyj dhe Dowan Plustry dhyworth Dulyn na wàr an neyj tre naneyl. Ny gefsyn ny ma’s nebes frobmans wàr dhallath an neyj ha pàn esen ny ow skydnya. Pelha wàr an neyj dhyworth Wordhen me a erhys hanaf a joclet tobm dhyworth an stywart. Yth esa an dowr rag ow dewas ow pryjyon, ha me a loscas ow thavas.