© 2014 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Dell wor pùbonen y fÿdh sensys in Scotlond mis Gwydngala an vledhen usy ow tos gwerynvôta rag determya a garsa pobel Scotlond gasa an Wlascor Udnys ha bos stât anserhak. Martesen y fÿdh fur rag Scotlond meras orth Wordhen, rag Wordhen yw an udn pow a wrug bythqweth forsâkya an Wlascor Udnys ha dallath bêwnans nowyth avell pow anserhak. Y feu lyther dyllys agensow i’n paper nowodhow The Financial Times dhyworth Graham Gudgin, erbysyas in Kergraunt, ow terivas pana anfusyk o anserhogneth Wordhen ow tùchya dysplêgyans erbysek an pow. In mil naw cans ha dew dheg dew, an vledhen may feu Wordhen anserhak, standard a vêwnans Wordhen o kepar ha Denmark. Warbydn an bledhydnyow try ugans bytegyns yth o Wordhen an pow moyha bohosak i’n North-West a Ewrop. An dyfyk uthyk-na a wharva kyn na wrug Wordhen kemeres radn vÿth i’n Secùnd Gwerryans an Bÿs ha kyn whrug Wordhen cafos Gweres Marshall dhyworth an Stâtys Udnys pàn o gorfednys an omlath. I’n bledhydnyow hanter-cans Wordhen a gollas moy ès mylyon person dre dhyvroans pò ‘emigration.’ An nùmber-na yw kepar ha nùmber a bobel a asas Wordhen dre rêson a dhyvotter brâs an nawnjegves cansvledhen. Wosa dew ugans bledhen a anserhogneth governans Wordhen a jaunjyas aga folycy, egery yn bàn aga erbys ha dynya cowethasow kesgwlasek aberth i’n pow gans tollow fest isel. Saw ny wrug hedna gwil dhe’n cowethasow genesyk performya re dhâ. Bys i’n bledhydnyow peswar ugans ha deg nyns o tevyans companys teythiak in Poblegeth Wordhen mar dhâ avell tevyans cowethasow Wordhen North, kynth esa erbys an North i’n termyn-na ow sùffra yn frâs gans lies bledhen a ancres dynasek. Apert yw na veu anserhogneth Wordhen sowena vrâs ow tùchya rycheth an pow, hag yth hevel kefrÿs martesen nag yw anserhogneth rag pow vÿth tremencubmyas automatek bys in sowenyans erbysek.