© 2013 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma lies tradycyon ow pertainya dhe’n Nadelyk in Wordhen nag yw genesyk i’n pow, saw a dheuth dhyworth an Vreten Veur. Yma udn tradycyon genesyk bytegyns ow longya dhe sêson an Nadelyk in Wordhen, Lá an Dreoilín pò ‘Dëdh an Wradnen.’ In Sowsnek yth yw an jëdh gelwys ‘Wren Day’ pò ‘Wran Day’ in Sowsnek Wordhen. An jëdh wosa dëdh Nadelyk, Degol Stefan, yma mebyon ha tus yonk in dyvers tyleryow ow qwysca aga honen in dyllas coynt a gala hag ow corra vysours wàr aga fâss. Ena y a gav gwradnen a vëdh kelmys dhe welen a bredn ha degys adro dhe bùb chy hadre vo an vebyon ow cana vers: Dreoilín, dreoilín, rí na n-éan, is mór mo mhuirín ach is beag mé féin ‘Gwradnen, gwradnen, mytern an ÿdhyn, brâs yw ow theylu saw me yw bian ow honen.’ Res yw dhe’n gwrageth chy ena ry neppÿth teg dhe dhebry dhedhans. I’n termyn eus passys y fedha ledhys an wradnen orth dyweth an jorna. I’n gwelha prÿs ny vÿdh an wradnen ledhys na felha. In gwir, dell yw ûsys hedhyw, nyns yw an wradnen ma’s fâls-edhen. Ny woryn ny poran pëth o fùndacyon Dëdh an Wradnen. Saw yth hevel an ûsadow dhe vos pòr goth ha dhe dhallath pell alebma i’n oos pagan. An wradnen yw edhen bian usy ow cortos pùpprÿs ogas dhe’n dor hag yma hy gerys dâ inwedh dre rêson a’y skentoleth. An wradnen ytho a hevel bos symbol a vab den. Dre lycklod an solempnyta o in y wredhyow sacryfîs pagan, gwrës orth howlsav an gwâv ‘the winter solstice’ dhe dhyserry an dhuwow, may whrella an howl derevel dhyworth hy savla isel i’n ebron ha may whrella an dedhyow tevy hir arta. Pàn dheuth an Gristoneth, ny ylly an sacryfîs bos alowys in sêson genesygeth Crist. Rag hedna res o dylâtya an solempnyta bys i’n jëdh wosa dëdh Nadelyk. Kyn nag yw Dëdh an Wradnen mar gebmyn avell kyns, yth yw an ûsadow bew in lowr a dyleryow whath.