(23) Jîns


© 2016 Nicholas Williams

Pùb gwir gwethys / All rights reserved


Clyckya obma ha goslowes / Click here to listen

Jîns.m4a


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Jîns a gafas aga hanow dre rêson a’n padn a vedhens y gwrës anodho. An padn a welas golow an jëdh in Jenoa in Italy hag yth yw Gênes hanow an cyta-na in Frynkek. In Nîmes, cyta in soth a Frynk gwiadoryon a whelas gwil an keth padn, saw y a wrug in y le qweth nebes haval dhodho. An secùnd padn-ma a gafas an hanow de Nîmes ‘dhyworth Nîmes’ pò denim. Ny wre padn jin costya nameur hag y fedha ûsys rag dyllas lavurya. Padn denim wàr an tenewen aral o moy garow saw creffa hag ytho y fedha ûsys dhe wil raglednow pò overalls. Kyns pedn an seytegves cansvledhen y fedha padn jin in ûsyans kebmyn rag gwil dyllas lavurya an bobel vohosak in north a Italy. Y fedha dyllas gwrës a badn jîn esporthys dre dhewla marners Jenoa dres oll an Ewrop. I’n cres an nawdhegves cansvledhen Jerman yonk, Levi Strauss, êth dhyworth Bavarya dhe’n Stâtys Udnys hag in mil naw cans pymp deg try ev a egoras shoppa gwara segh in San Francisco. Ev a wre gwertha dyllas ino. Onen a’y brenoryon o Jacob Davis, neb a veu genys in Latvya. Warbarth Strauss ha Davis a dhesmygyas an raglen vlou jin pò blue jean overall. Y teuth an lavrak blou jin wosa hedna. Y fedha an dyllas-na comendys rag bughwesyon ha spessly dhe dus bal. An lavrak jin a’n jeva gorthkentrow pò rivets in le a votodnow rag surhe na wre an dra fyllel i’n termyn cabm. Pelha yth o gwrës a badn na wre lehe in glebor, hag yth esa kevren vew pò zip fastener warnodho rag êsya taclow. Yth esa fysky rag owr pò gold rush Calyfornya in y bryck uhella i’n termyn-na ha lavregow Levi Strauss a werthas yn tâ. In bledhydnyow hanter-cans an ugansves cansvledhen fylmys kepar ha ‘Rebel without a Cause’ gans James Dean a wrug ober brâs rag settya lavregow jins dhyrag an bobel. Wostallath nyns o jîns ma’s dyllas lows rag lavurya inhans. Lebmyn yw y dyllas fashyon. Ny via pùb cùssulyores gîs ow comendya jîns rag benenes bytegyns. Moy ledan yw tin an venyn ès tin an den hag nyns usy jîns ytho ow tesedha pùb benyn. Mars usy hy ow lavurya i’n lowarth pò ow paintya an chambour delergh, jîns yw dâ lowr. Rag kenyver ocasyon aral gwell martesen yw losten.