(234) 'Let it snow'


© 2020 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Sowsnek pàn wrellen ny erhy nebonen dhe wil neb tra, yth eson ny owth ûsya an gis gorhemynek ‘the imperative mood’, rag ensampyl, ‘Do this,’ ‘Don’t do that,’ ‘Speak up!’ ‘Be quiet!’ In Kernowek yma dyffrans inter an formys ûsys rag an nyver udnyk ha’n nyver liesek. Ny a lever Gwra hedna dhe udn person, saw Gwrewgh hedna dhe dhew dhen pò moy. In Bewnans Ke ow côwsel orth Tewthar an sans a lever: Golsow lemmyn ha bÿdh fur saw in Creacyon an Bÿs Lûcyfer ow côwsel orth oll eleth nev a lever, Golsowowgh dha vy lebmyn. In Sowsnek pan ven ny ow comendya dh’agan cowetha may whrellen ny neb tra warbarth, yth eson ny owth ûsya an verb gweresek ‘let’, rag ensampyl ‘Let’s do it’, ‘Let’s stay here’, ‘Let us examine the question in more detail’. In Kernowek wàr an tenewen aral y hyllyn ny ûsya an verb gweresek gwil: rag ensampyl ow côwsel adro dhe Satnas Jowan Tregear a lever: Rag henna gwren ny kemeres with ha’y avoydya. Pelha in Creacyon an Bÿs Seth a lever: Dhe’n Tas gwren oll pejy na skydnyo an keth venjans in neb termyn warnan ny. In lavarow a’n par-na ny a yll inwedh gwil warlergh an Sowsnek hag ûsya an verb gasa ‘let.’ Rag ensampyl Rag henna gesowgh ny dhe veneges agan honen dhe Dhuw (Tregear). In tyller aral Tregear a scrif: Gesowgh ny dhe remembra pana dhysplêsour a wrussyn ny gwil warbynn Duw. In Sowsnek mars on ny whensys dhe erhy nebonen i’n tressa person dhe wil neb tra, ena inwedh ny a vydn ûsya ‘let’, rag ensampyl ‘let him show us’, ‘let them begin immediately.’ In Kernowek wàr an tenewen aral yth eson ny owth ûsya an verb i’n gis gorhemynek, form usy ow tewedha gans -ens udnyk ha liesek. In Origo Mundi warlergh formya an bestas ha’n ÿdhyn Duw a lever: Dhedha me a worhemmyn: encressyens ha bewens pell ‘I command them: let them encrease and live long’. In Bêwnans Ke Ke y honen a lever: Bedhens mar freth del vynho, ny’m beus own a gows orto ‘let him be as forthright as he wishes, I am not afraid to speak to him’. Dre rêson gwil dhe vos ûsys yn fenowgh avell verb gweresek, pòr gebmyn ywa i’n gis gorhemynek i’n textow; rag ensampyl: lemmyn gwrens y dhelyfrya ‘now let him deliver him’ (Passio Christi); gwrens ow servya daily ‘let her serve me daily’ (Bêwnans Meryasek); Rag henna gwrens tus dowtya an Tas Duw dhe offendya ‘therefore let men fear to offend God the Father’ (Creacyon an Bÿs). I’n lavarow a’n sort-na inwedh ny a yll ûsya an gis sojeta pò ‘subjunctive’ gans an demygen re dhyragtho. Rag ensampyl Maria re bo gordhys ‘Let Mary be revered’ (Bêwnans Meryasek); dres pùb oll re’n gordhyo ‘let him honour him above all’ (Passio Christi); Re’th weresso benytha ‘Let him assist you always’ (Bêwnans Ke). Herwyth Lhuyd ‘it is hailing’ in Kernowek yw Yma ow cul keser, hag ‘it is snowing’ yw Yma ow cul ergh. Rag hedna, mars on ny whensys dhe drailya tîtel an gân ‘Let it snow’, ny a vydn leverel Gwrens ergh pòken martesen Re wrello ergh.