(248) Jowan Keigwyn


© 2020 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In bledhydnyow avarr an êtegves cansvledhen yth esa bagas a dus deskys in Pensans ha’n pow adro ow whelas selwel an tavas coth. Patryark an scoloryon o Jowan Keigwyn. Ev a veu genys i’n vledhen mil whe cans peswar deg onen. In y ragscrif dh’y gramer Kernowek Edward Lhuyd a lever fatell gafas ev gweres brâs dhyworth Jowan Keigwyn ‘a’n Chy Iselha in Por’ Enys.’ Yma Nicholas Boson ow kelwel Keigwyn ‘den deskys fur,’ hag in y dhedhyow y honen Keigwyn a vedha consydrys wosa Edward Lhuyd dhe vos an brâssa scolor i’n Yêth Kernowek. Pelha Keigwyn o an kensa den bythqweth a whelas convedhes textow an Kernowek Cres ha’ga thrailya dhe Sowsnek. Ev a lavuryas wàr an Ordinalia, Pascon agan Arlùth, ha wàr Creacyon an Bÿs. Kyn verwys Keigwyn in dallath an êtegves cansvledhen, ny veu y versyons an textow ha’y drailyansow dyllys bys in bledhydnyow ugans an nawnjegves cansvledhen. Davies Gilbert a gemeras an ober warnodho y honen a dhyllo an dhew dext dewetha-na. Mar dhygompes o an versyons dyllys gans Gilbert, may feu res dhe Whitley Stokes gwil dylansow nowyth hanter-cans bledhen moy adhewedhes. Ow tùchya dyllans Keigwyn a Passyon agan Arlùth Edwin Norris a lever fatell eus dhe’n lyha êth errour in kenyver gwers; in versyon Keigwyn a’n Creacyon warlergh Norris yma ugans errour wàr bùb folen. Dre rêson a imperfethter an dylansow-na, Jowan Keigwyn re beu acûsys a fowt a skians a Gernowek an Osow Cres. Talek (E.G.R. Hooper) a gresy fatell veu Keigwyn cablys yn cabm. Ev a lever fatell o Davies Gilbert dhe vlâmya, drefen na ylly ev redya dornscrefa Keigwyn ha na wodhya ev an tavas naneyl. Ny gresaf vy ow honen defens Talek dhe vos gwir. In onen a’y lytherow Edward Lhuyd y honen a lever adro dhe Keigwyn ha’y dhas-scrif an Ordinalia: ‘Ev a wrug y jaunjya herwyth y vodh y honen pàn nag o va plêsys ganso pò pàn na wrug ev y gonvedhes.’ I’n vledhen mil whe cans peswar deg try Charlys Mytern a screfas lyther dhe bobel Kernow owth aswon grâss dhodhans rag y scodhya ev i’n gwerryans dynasak. An lyther a veu das-screfys ha cregys in bàn in eglosyow dres oll Kernow. Ny a’gan beus trailyans a’n lyther-na dhe Gernowek darbarys gans Jowan Keigwyn, hag apert yw dhyworth y drailyans nag o Keigwyn mar godnek i’n tavas dell esa y gowetha ow cresy. I’n lyther yma Keigwyn owth ûsya an plûral nùmber warlergh an ger lies. Yma va ow screfa arhans rag ‘money’ pàn nag usy arhans i’n tavas tradycyonal ow styrya ma’s ‘silver’ yn udnyk. Nyns eus ger Kernowek vëth dhe Keigwyn in mesk taclow erel rag ‘enemy’, ‘to print’ ha ‘camp.’ Pelha Keigwyn a scrif milchamath ‘war’ in Ebrow, dre rêson nag eus ger vëth Kernowek dhodho. Pàn verwys Keigwyn i’n vledhen mil seyth cans whêtek, Jowan Boson a screfas gwersyow orth y braisya. Boson a lever y vos: I’n tavas Grêca, Latyn ha’n Hebra/ In Frynkek ha Kernowek deskys dâ. Ny worama adro dhe skentoleth Keigwyn i’n tavosow erel-na, saw ow tùchya an Kernowek in gwiryoneth yth hevel nag o Keigwyn ma’s hanter-deskys.