(260) Wella Rowe


© 2020 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Wella Rowe o tiak in Eglos Sancres in west a Gernow. Ev o gelwys Wella Kerew traweythyow, hag in y deylu y honen an form o Willow Kereve. In bledhydnyow deg ha peswar ugans a’n seytegves cansvledhen ev o troplys fatell esa y davas genesyk, an Kernowek, in peryl a vos kellys. Rag hedna ev a drailyas dhe Gernowek in mes a’n Scryptour Sans an Deg Arhadow, whedhel Adam hag Eva, whedhel genesygeth Crist ha temptacyon Crist i’n dyfëth. Ev a screfas gerva Kernowek inwedh hag istory a’y deylu y honen. Yma y dhornscrif gyllys wàr stray. I’n vledhen mil seyth cans ha try warn ugans bytegyns an Revront Ustyk, prownter Eglos Breg, a welas an dornscrif in posessyon Mathew, mab Wella Rowe, ha das-scrifa an radnow in mes a’n Beybel. Yma an das-scrif i’n Lyverjy Bretednek lebmyn. An text Kernowek ino re beu dyllys moy ès unweyth. Wella a dhemedhas Florens Baynard. Florens o côwsor genesyk a’n tavas Kernowek kefrÿs. Kynth hevelly Wella dhe vos troplys ow tùchya ancow an tavas Kernowek, ny wrug ev na’y wreg côwsel ma’s Sowsnek orth aga flehes—ervirans na wrug nameur rag selwel an tavas. Dell hevel ny wrug Wella bythqweth desky an gîss hengovek a screfa Kernowek. Yma nebes taclow dhe verkya in trailyansow Rowe, usy ow prevy ev dhe screfa form adhewedhes a’n tavas. Rag ensampyl in le sevel ev a scrif saval, hag in le leverel ev a scrif lawl. Yma rag-oclûsyans pell avauncys ganso kefrÿs, rag ev a scrif hedda rag hedna. Yma va owth ûsya an rakhanow anjy rag ‘they, them’, rag ensampyl in pa’ wrug anjy gwelas an steren, th’o anjy lowen gen meur a lowender ‘when they saw the star, they rejoiced with great joy’. Ev a scrif vy rag me ‘I, me’, dha vy rag dhybm ‘to me’, ha rag dhyworthyf ‘from me’ ev a scrif dhùrtam. Pelha yth o geryow benthygys dhyworth Sowsnek part essensek a’y erva, rag ensampyl desîrya ‘to desire’, frantyk ‘lunatic, deranged,’ cùssys ‘cursed, cussed’ ha profet ‘prohet.’ Dhe verkya inwedh yw fatell usy Rowe owth ûsya -s an Sowsnek rag gwil an plûral nùmber, rag ensampyl: screfors ‘scribes’ ha pùscadors ‘fishermen.’ Y skians a’n tavas bytegyns yw pòr dhâ. Goslowowgh, rag ensampyl, orth an kescows-ma in trailyans Rowe inter Duw Ollgalosak hag Adam, Eva ha’n Serpont: Pyw a wrug lawl dhis ’tell esta yn noth? A wrusta debry dhort an wedhen a wrug vy lawl dhis a na wrêsta debry? Ha’n den a gowsas, An venyn a wrusta ry dha vy, hy a ros dha vy dhor an wedhen ha vy a wrug debry. Ha’n Arlùth Duw a gôwsas dha’n venyn, Pandr’yw hema eus gwrës genes? Ha’n venyn a worthebas, An hager-brëv a dùllas vy ha vy a wrug debry. Ha’n Arlùth Duw a lavaras dha’n hager-brëv, Drefen che dha wil hema, th’o’che molethys dres oll an chatel ha dres kenefra bestas a’n gwel. Wàr dha dorr che a wra mos oll dedhyow dha vownas. Yma Rod Lyon owth estêmya Wella Rowe yn frâs, ha Rod a lever adro dhe drailyansow Rowe: ‘Êsy yw gweles pana berfëth yw Kernowek Wella Rowe dhe servya dhyn avell fùndacyon agan tavas côwsys.’

Nôten: I’n recordyans-ma me a lever hanow teylu Wella Rowe avell an ger rowrêvya/ in Sowsnek. Yma radn orth y bronowncya avell an ger Sowsnek raw.