© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Moy ès try hans bledhen alebma yth esa tregys wàr an âls in Tregathyel ogas dhe Lanust tebel-was pur. Y fedha leverys fatell o va morlader saw y gowetha a’n consydra re gasadow dhe remainya in aga mesk hag y a’n herdhyas dhywortans. Ev a dheuth dhe vos tregys i’n west pell a Gernow hag a gafas rychyth brâs dre sherewynsy. Pàn esa pobel erel in cùsk ev a vydna gorra margh in mes wàr an clegar ha lantern anowys adro dh’y godna. Y fedha an margh sprallys gans an den, y bedn kelmys dh’y droos arâg ma na ylly an margh truan kerdhes ma’s yn lent. Marners in mes wàr an mor a wely golow an lantern ha’y gresy dhe vos golow adhelergh a neb gorhal. Y a wre sewya an golow hag y ow cresy fatell esa meur a’n mor efan dhyragthans. In le a hedna y a vydna dos ogas dhe’n carygy ha terry aga lester warnodhans. Pàn wrella an marners assaya dhe grambla in bàn wàr an clegar an tebel-was a vydna aga cronkya wàr an pedn gans y vool. Mar qwrêns y sêsya carrek rag sawya aga honen, ev a vydna trehy aga dêwla dhywortans. Heb mar pynag oll pÿth a vedha wàr an gorhal terrys an tebel-was a vydna kemeres ragtho y honen. Indelha y rychyth a devys. Wàr an dyweth an termyn a dheuth rag an Jowl dhe gemeres an pehador dhodho y honen. Pàn esa ev in newores y feu clôwys y scrijow uthyk abell: ‘Gwrewgh ow gwetha orth an Jowl hag orth an marners usy ow whelas ow sqwardya dhe dybmyn!’ Y feu somonys prownter an bluw. In chambour an tebel-was ev a whelas dhe bellhe an Jowl. Ny wrug ev soweny rag yth esa an Jowl ow chaunjya y shâp pùpprës ha warlergh pùptra an Jowl a wrug kelyonen anodho y honen. Kynth o sêson an drevas y feu chambour an tebel-was mar dewl avell an nos. Dew dhen esa ow mejy barlys ogas dhe jy an sherewa a glôwas lev ronk ow kelwel: ‘Devedhys yw an termyn, saw nyns yw an den devedhys whath’. Y a veras in mes orth an mor ha gweles gorhal du ow tos bys i’n tir. An lester a dheuth mar ogas dhe’n âls na yllens gweles ma’s top an wern indadnans. Ena cloudys tewl du a apperyas dhe sevel in mes a’n todnow ha fystena bys in chy an tebel-was. Y wharva hager-avel uthyk, taredna ha luhes. An hager-awel a cessyas yn sodyn. Ena nebes kentrevogyon a gùntellas rag gorra an den marow in y logel ha’y dhon dhe’n encladhva. Yth hevelly an logel dhe vos re scav dhe vos lenwys a gorf. Pàn esens ow kerdhes dhe’n eglos, y whrug porhel du aga sewya. Adhesempys an ebron a veu tewl arta hag y talathas an secùnd hager-awel. Rag ewn own an dhegoryon a asas an logel wàr an dor ha fystena rag sentry aberth i’n eglos. Pàn o passys an hager-awel y a dheuth in mes. Ny ylly logel vëth bos gwelys. Nyns esa wàr an dor ma’s dewdhorn an logel ha nebes kentrow. An eler o leskys dhe lusow gans an luhes.