(270) Peran Sans


© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An pympes dëdh a vis Merth yw Degol Peran. I’n gwetha prÿs scant nyns yw tra vëth godhvedhys adro dhe’n sans y honen. Nyns yw aswonys bledhydnyow y vêwnans ha’y hanow y honen yw mystery. I’n dedhyow coth y feu merkys fatell usy an kesson in Kernowek ow cortheby dhe c in Godhalek, rag ensampyl in Kernowek penn saw cenn, ceann in Godhalek. Y feu gorrys in rag ytho fatell o Peran an keth person avell sans brâs in Wordhen Ciarán Clonmacnoise. Dre rêson a hedna y feu wharvedhyansow bêwnans Ciarán desedhys dhe acordya gans an Sans Kernowek. Ow tùchya yethorieth bytegyns ny yll an dhew hanow Ciarán ha Peran bos kelmys poynt. Oliver Padel a verkyas Pierguin in rol a henwyn Bretednek dhyworth an dhegves cansvledhen hag ev a gomendyas fatell o Pierguin an keth hanow martesen avell Peran. Pierguin a via Pierwyn moy adhewedhes, saw re bell yw hedna dhyworth Peran dhe vos versyon anodho. An hanow nessa dh’agan sans ny yw flogh gelwys Peiryan ‘Arlùth bian’ in Kembrek Coth. Pelha y feu ascorn a neb sans gelwys Pieranus aswonys in Pow an Sowson i’n unegves cansvledhen. Yth esa chapel sacrys dhe Peran in Kerdydh in Kembra i’n dhewdhegves cansvledhen. Peran Sans ytho a yll bos Kembro martesen. Devôcyon dhe Peran in Kernow a dhalathas in Peran i’n Treth ha’n mencyon moyha avarr dhodho yw Carnperan in Peran i’n Treth in naw cans ha try ugans. Revrons dhe Peran Sans a lêsas dhyworth Peran i’n Treth dhe dyleryow erel in Kernow ha dhe Vreten Vian. Warbydn an dredhegves cansvledhen eglos pluw Peran i’n Treth a’s teva meur a grêryow pò ‘relics’ a’n sans: y bedn, crêrva esa corf an sans inhy, y scudel arhans, y vagyl o cudhys gans owr, arhans ha jewelys, crows arhans esa crêryow bian erel inhy, y grows vian gwrës a ascorn ha clehyk bian a gober. Yth o pluw Peran i’n Treth ledan lowr hag yth esa Breanek ‘St Agnes’ radn anedhy. Y fedha crêryow an sans degys oll adro dhe’n bluw vrâs spessly in Seythen an Pejadow dhyrag De Yow an Ascensyon. Yma lavar coth recordys gans Pryce: Sten Sen Agnes yw an gwella sten in Kernow. Dre rêson Breanek dhe vos radn a bluw Peran i’n Treth, yth hevel fatell veu Peran Sans ha’n devôcyon dhodho kelmys gans stenoryon Kernow. Awos Kernow dhe vos gerys dâ rag hy sten ha’y stenoryon Peran Sans a veu degemerys avell sans tasek Kernow hy honen. I’n vledhen mil seyth cans pymp deg eth William Borlase a scrif: ‘Yma an stenoryon ow solempnya Degol Peran an pympes dëdh a vis Merth; ymowns y ow powes dhyworth pùb ober, hag in pùb bal a’n brâssa sort, yth yw mona rës dhodhans dhe lowenhe in onour Peran Sans, rag yth yw recordys fatell ros ev dhodhans skians a brow ow tùchya gonys sten.’ Yth yw crows wydn wàr bark du aswonys hedhyw avell baner Peran Sans hag ytho avell baner kenedhlek Kernow. Dell yw ûsys yma an baner-na styrys avell crows a sten oberys gwydn warbydn gilva a vûn sten du. Yma an styryans-na ow sensy an colm inter Peran Sans ha stenoryon Kernow.