(273) An Teyr Hùssul


© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw whedhel an teyr hùssul drolla kesgwlasek gweryn ha versyons anodho yw kefys in lies pow. Onen a’n versyons moyha avarr yw gwelys in whedhel Godhalek Cres Merugud Uilix pò ‘Gwandrans Ûlyssês,’ a veu screfys i’n unegves cansvledhen. Yma versyons erel kefys in Eynda, in Jermany hag in lies tyller moy. Ot obma versyon dhyworth Scotlond: Yth esa den bohosek tregys in Uheldiryow gans y wreg ha’y vab. Nyns o dâ an dor ha res o dhe’n Scot mos dhe Bow an Sowson rag cafos whel. Ev a veu arvedhys gans tiak hag a’n servyas yn tâ. Pàn o termyn ragtho dhe dhyberth, y vêster a offras dhodho poneyl y wober pò teyr hùssul. Ev a dhôwysas an teyr hùssul. An re-na o: kensa, pàn ves ow mos tre, gwith dhe’n fordh vrâs; nessa: na wra ôstya in chy may fÿdh benyn yonk demedhys dhe dhen coth; tressa: na wra tra vÿth heb predery dywweyth. An mêster a ros dhodho torth vara ha leverel dhodho heb hy therry erna wrella ev hy debry gans y wreg. I’n fordh an Scot a vetyas gans gwycor kerdh hag anjy êth in rag warbarth erna dheuthons dhe scochfordh. An Scot a remembras an gùssul ha gwitha dhe’n fordh vrâs. Pàn wrussons dos warbarth arta, yth esa an gwycor owth ola, rag y sagh a veu ledrys dhyworto i’n scochfordh. Ena y a dheuth dhe jy, ha’n gwycor a garsa ôstya ino, saw an Scot a welas fatell o den coth ost an chy ha’y wreg o benyn yonk. Ev a remembras an secùnd cùssul hag êth in mes dhe’n skyber rag cùsca. Dres nos an Scot a glôwas nebonen ow mos dresto i’n tewolgow. Ev a drohas darn in mes a gôta an stranjer. Myttyn avarr an venyn a grias fatell veu ledhys hy gour i’n nos. An chy a veu sarchys hag y feu collel wosek kefys in pocket an gwycor. Ev a veu lêdys dhe’n cloghprednyer dhe vos cregys. An Scot bytegyns a welas an wedhowes in company gwas yonk, ha côta an gwas yonk o a’n keth lyw poran avell an darn trehys in mes ganso dres nos. Ev a dhysqwedhas an darn ha’n venyn ha’y garor a veu cregys. Ena an Scot a dhrehedhas y jy y honen. Ev a veras der an fenester ha gweles den yonk sêmly i’n gwely. Porposys o va dhe fystena ajy rag y ladha, saw ev a remembras an tressa cùssul. Y wreg a dheuth in mes ha côwsel indelma: ‘An den yonk i’n gwely yw agan mab neb a dheuth tre newher dhyworth servys ha cùsca i’n gwely-na.’ Ena an Scot a drohas an dorth vara ha cafos inhy oll mona y wober. Ow goslowysy a vydn percêvya an whedhel-na dhe vos versyon a’n drolla aswonys dhyn ny in Kernow avell Jowan Chy an Hordh. Hèn yw an udn whedhel weryn in Kernowek. Recordys veu va gans Lhuyd orth dallath an seytegves cansvledhen. Apert yw inwedh fatell yw cotha an whedhel Kernowek ès hedna, rag caror an venyn yonk i’n versyon Kernowek yw managh. Warbydn an seytegves cansvledhen gyllys dhyworth Kernow o pùb managh.