© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Perkyn Warbeck a veu genys in Pow Beljan i’n bledhydnyow deg ha tryugans a’n pymthegves cansvledhen. Pàn o va nebes moy ès ugans bloodh, ev a glêmyas in Bòrgayn (Frynk hedhyw) y vos mytern lafyl Pow an Sowson. An whedhel a wre va plauntya o hebma: pàn veu an dhew bensevyk ledhys in Tour Loundres wàr arhadow an Tressa Rychat, ev, an broder yonca a scappyas, rag poos o gans an tormentour ladha mab bian inocent. Y vroder cotha o Edward, saw drefen ev y honen dhe vos er lafyl y vroder ha drefen y hanow dhe vos Rychat, herwyth laha ev o Peswora Rychat Pow an Sowson. Perkyn, in dadn an fuk-hanow-na, a wainyas meur a scodhyoryon wàr vrâstir Ewrop. Perkyn ha’y scodhyoryon a diras in Kynt, saw y a veu assaultys gans soudoryon lel dhe’n mytern, an Seythves Henry. Perkyn a fias, kyns oll dhe Wordhen, hag ena dhe Scotlond. Mytern Scotlond a ros dhodho meur a scodhyans rag ev a welas fatell ylly Perkyn (in dadn an hanow Rychat) bos a brow dhodho in y strif warbydn mytern Pow an Sowson. In Scotlond Perkyn a dhemedhas Arlodhes Cattern Gordon hag a feu an maryach solempnys gans lowender brâs. I’n vledhen mil peswar cans naw deg seyth Perkyn gans y wreg a diras in Kernow, nebes mîsyow warlergh rebellyans Myhâl Josef. Perkyn a gùntellas adro dhodho lu a whegh mil den; saw y fowns y fethys yn scon gans soudoryon Henry. Perkyn a fias. Ev a veu kechys, ha warlergh whelas diank ev a veu gorrys dhe’n mernans. Perkyn in mesk tîtlys erel a elwy y honen Pensevyk Kembra. Dell hevel ev a gonsydras y honen dhe vos Dûk Kernow kefrÿs. Mars yw hedna gwir, nena Cattern y wreg o Dùches Kernow. Pàn esa hy gour ty ow caskerghya warbydn Henry Mytern, Cattern a remainyas in West a Gernow. Yth hevel fatell o vysyt Cattern remembrys i’n Kernow adro dhe gans ha hanter-cans bledhen moy adhewedhes, pàn wrug Nicholas Boson screfa y lyver The Duchess of Cornwall’s Progress. Dre lycklod an venyn nôbyl i’n lyver yw Cattern Gordon, gwre’ty Perkyn Warbeck. Boson a screfas an lyver in Sowsnek saw yma lavarow Kernowek dhe gafos in tyleryow ino. Cùntellva yw an Progress a lien gweryn an West a Gernow. Screfys veu gans Nicholas rag dydhana y flehes ha rag desky dhodhans adro dhe dradycyons an bobel i’n côstys-na. I’n lyver yma an Dùches in mesk taclow erel ow qwil hy fejadow in Carn Bre. Present ena yw Harry Ermyt, neb yw acûsys gans Deyn Eglos Veryan a vos drog-colyak. Nyns yw gesys a’n lyver ma’s darnow. I’n Progress Cattern Gordon yw gelwys Arlodhes Kernow, rag ensampyl in lînednow-ma Rag gàn Arlodhes dâ/Ny a venn gwil gàn moyha. Kyn feu Perkyn gorrys dhe’n mernans orth very dyweth an pymthegves cansvledhen, y wedhowes Cattern a vêwas dew ugans bledhen wàr y lergh hag a dhemedhas teyrgweyth moy.