© 2016 Nicholas Williams

Pùb gwir gwethys / All rights reserved


Clyckya obma ha goslowes / Click here to listen

Davyth ha Goliath 2.m4a


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a leverys neb tra agensow ow tùchya Davyth ha Goliath, campyor an Fylystînys. Yth hevel bos nebes scolers ow cresy nag o an story i’n Beybel whedhel Ebrow wostallath, saw an narracyon dhe vos benthygys martesen dhyworth an Grêkys. Nyns o pobel an Fylystînys a’n keth teylu avell an Israelysy. Y o moy ogas dhe’n Grêkys. Heb mar nyns yw hanow Ebrow an hanow Goliath ha kelmys yw traweythyow gans Alyattês, mytern Lydya. Scolers erel re golmas an hanow gans Uliat, hanow neb yw kefys in mesk pobel gelwys Caryans in Âsya Vian, hag a gowsy tavas Indo-Ewropek. Pynag oll yw devedhyans an story in y versyon gwredhek, martesen y fia fur meras orth an whedhel dell ywa rës i’n Beybel, in Kensa Lyver Samûel. Goliath yw cowr in gwir rag ev yw leverys dhe vos naw tros’hës in uhelder. Pàn wrella Davyth dos wàr bydn Goliath, ev a gry in mes serrys brâs: ‘Ov vy ky, pàn esta ow tos wàr ow fydn gans gwelyny?’ Saw ny lever an Beybel ma’s Davyth dhe dhon y lorgh ganso. Udn welen, adar gwelyny. Pàn wrella cowr an Fylystînys nessa dhodho, otta Davyth ow corra y dhorn in y sagh hag ow tedna in mes bùlien, orth hy settya in y dowlbredn rag hy dehesy orth Goliath. Yma an men ow qweskel an dên brâs wàr an tâl, owth entra in y empydnyon hag ow qwil dhodho codha wàr an dor. Ena yma Davyth ow tos hag orth y ladha gans y gledha y honen. Yma cleves aswonys yn tâ yw gelwys acromegaly gans medhygyon agan dedhyow ny. Yma an dysês-na ow causya damach dhe’n wagren bûr pò ‘pituitary gland’; hèn yw an radn a’n empydnyon usy ow rêwlya tevyans an corf. Pàn vo nebonen ow sùffra gans an cleves-na, yma va ow tevy uhel drês ehen. Ha pelha yma an dysês ow pystyga y lagasow. Yma an den clâv ow qweles dôbyl traweythyow, hag yma va ow sùffra gans gwelesygeth keyfordh pò ‘tunnel vision.’ Mars esa Goliath clâv gans acromegaly, hedna a vynsa styrya nebes taclow yn perfeth: ev dhe vos a uhelder dres kynda, ev dhe weles gwelyny, pan nag esa ma’s udn welen in dorn Davyth; ha moy ès pùptra ev dhe vos dyswar a’n vùlien dehesys orto gans Davyth a’n eyl tenewen martesen. Na fors ple teuth whedhel Davyth ha Goliath dhyworto, dre lycklod yth esa Goliath ow sùffra condycyon anyagh. Ha hèn o an rêson y feu Davyth abyl dh’y fetha.