(285) Lynchehaun


© 2015 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Agnes McDonnell o gwreg dadhelor pò barrister in Loundres. Hy a brenas chy brâs wàr Enys Achill in Conteth Mayo in bledhydnyow peswar ugans an nawnjegves cansvledhen. Y fedha hy tregys i’n chy-na yn fenowgh hy honen oll dre rêson negys hy gour dh’y sensy in Loundres. Agnes a wrug arveth James Lynchehaun, den genys in Achill, rag bos hy mainor pò agent. Warlergh termyn strif a sordyas intredhans hag Agnes a wrug bragya James y whre hy settya an laha warnodho. In mis Hedra mil eth cans eth deg peswar James a assaultyas Mêstres McDonnell yn harow ha gorra tan in hy chy neb a veu tebel-shyndys. Ny veu Agnes hy honen ledhys, saw pàn veu hy kefys hy o ogas marow. Hy o cudhys in goos. Hy garr o drog-leskys ha crogen hy fedn o terrys. Kellys o udn lagas gensy hag yth o hy frigow brathys dhywar hy fâss. Nebes eythyn o herdhys hy fryvetta in bàn. Heb let an creslu a settyas dalhen in Lynchehaun, saw ev a dhiancas dhywortans dres nos ha cothmans dhodho a’n kelas nebes mîsyow. Lynchehaun a veu kechys wàr an dyweth hag a recêvas avell breus pryson rag y vêwnans. Warlergh seyth bledhen in pryson Maryborough (Port Laoise hedhyw), Lynchehaun a scappyas arta hag êth in dadn gel dhe’n Stâtys Udnys. Yth esa an auctorytas Bretednek ow tesîrya may fe va extradies ha Lynchehaun a veu sêsys gans an greswesyon in Indianapolis ha drës dhyrag an gort. Ena ev a blêntyas ev dhe wil an taclow a wrug ev in Conteth Mayo dre rêson y vos esel a Vredereth Repùblycan Wordhen pò an Fenians, hag ytho y feu gwrës y gabmweyth rag scodhya gwiryow tiogow bian. An gort a dhegemeras an styryans-na ha determya na godhvia y dhanvon wàr dhelergh dhe Wordhen. Lynchehaun a remainyas frank remnant y dhedhyow. Agnes McDonnell a vewas lies bledhen wosa an assaultyans, rag ny verwys hy bys in mil naw cans dew dheg try. Pàn wre hy apperya dhyrag an bobel, bythqweth hy a wysca veyl dhyrag hy fâss rag cudha hy dyfelebyans. In dallath an ugansves cansvledhen J.M. Synge a bresentyas dhe’n bës y wary The Playboy of the Western World. Tyller an gwary yw Conteth Mayo ha’n chif-person ino, Christy Mahon, yw grôndys dre vrâs wàr James Lynchehaun, kyn na wrug Mahon in gwary Synge ma’s ladha y das y honen adar assaultya benyn dhyweres. Lies onen a gresy gwary Synge dhe vos despît uthyk dhe bobel an West a Wordhen. An gwiryoneth yw bytegyns fatell o liesgweyth lacka James Lynchehaun dhyworth Conteth Mayo ès caracter in gwary vëth.