© 2015 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Cymbeline, an gwary gans Shakespeare, a veu performys rag an kensa prës i’n vledhen mil whegh cans hag udnek. Cymbeline, an chîf person in gwary Shakespeare yw grôndys wàr vytern Brethonek esa ow pewa i’n bledhydnyow adro dhe enesygeth Crist. Hanow istorek Cymbeline o Cunobelinos, hag yma y hanow owth appperya in Kembrek avell Cynfelyn. In Kernowek hedna a via *Kenvelyn. Kenvelyn istorek o kefrîsys gans an Romans ha’y wlascor o pow efan in soth-ëst a Vreten Veur. Y bednplass o Camulodunum (Colchester in Essex lebmyn). Kynth yw Cymbeline in gwary Shakespeare grôndys war Cunobelinos, Shakespeare a gafas whedhel Cymbeline dhyworth cronyclys Raphael Holinshed, ha Holinshed y honen a gafas y narracyon dhyworth Jeffry Menow pò Geoffrey of Monmouth. Nyns yw lyver Jeffry dhe drestya avell istory gwiryon. Cymbeline herwyth Jeffry o mab Tenvantius, Dûk Kernow. Tenvantius a veu mytern Breten Veur ha Cymbeline a’n sewyas. Saw Shakespeare a worras aberth in y wary wharvedhyansow ow tùchya myrgh Cymbeline, neb yw demedhys gans Posthumus, den wordhy nag yw a woos rial. Res yw dhe Posthumus fia dhyworth Breton Veur, rag yma pobel ow whelas y ladha. Posthumus â dhe Rom hag ena metya gans Iachimo. Yma Iachimo ow kenwhystla gans Posthumus y hyll ev y honen mos dhe Vreten Veur ha sedûcya myrgh an mytern ha dry dùstuny wàr dhelergh dhe Posthumus ev dhe gùsca gans an bensevyges. Nyns usy towl Iachimo ow spêdya wàr an dyweth hag yma an gwary ow corfedna yn lowen. A les ywa i’n gettesten-ma fatell eus hanow Italek dhe Iachimo, hèn yw Giacomo, an form Italek a Jamys. Yth hevel fatell dheuth an radn-na a’n whedhel dhyworth penfenten Italek. A les inwedh yw hanow mergh Cymbeline, Imogen. Acordys yw an scolers nag o Imogen an form wredhek adar Innogen. An hanow Innogen yw a dhevedhyans Godhalek,  rag form goth ywa a’n ger Godhalek ingen usy ow styrya ‘mergh’ pò ‘mowes’. Nyns yw sur ple cafas Shakespeare an hanow. Yth yw udn dra certan bytegyns. Kynth yw an hanow Imogen camredyans, yma va meur-gerys abàn veu performys an gwary Cymbeline rag an kensa prës.