(289) Argovrow


© 2015 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma an ger Sowsnek ‘dowry’ ow styrya pyth pò mona rës gans hy theylu dhe’n vyrgh pan vo hy ow temedhy. Nyns eus ger rag an dra-na in Kernowek saw an Bretonek yw argouroù ha’n Kembrek yw argyfrau. Yth hevel fur ytho grôndya wàr an re-na an ger nowyth argovrow ‘dowry’ in agan yêth ny. Porpos an argovrow o dhe brovia rag flehes an maryach pò martesen rag ry dhe’n venyn pegans a pe hy gesys yn gwedhowes. Pàn wrug an Secùnd Charlys demedhy Catheryn a Braganza prynces Portyngalek i’n vledhen mil whegh cans whegh deg onen cùrun Portyngal a ros dhe vytern Pow an Sowson dyw cyta vrâs avell dowry, onen anodhans o Bombay in Eynda (Mumbai lebmyn). In gwary Shakespeare Kyng Lir, yma an mytern ow teclarya y vos ervirys dhe radna y wlascor inter y deyr myrgh. Ev a lever inwedh fatell wrowns y recêva argovrow warlergh aga herensa dhodho. Yma an dhyw vyrgh gotha, Regan ha Goneril ow tias na yll oryon bos settys dhe’n gerensa a’s teves y dha’ga thas. Cordêlya, an vyrgh yonca, bytegyns, a leverel hy dhe gara hy thas mar veur dell yw res, saw yma hy owth addya y fëdh res dhedhy cara hy gour ty inwedh, pàn vo hy demedhys, hag ytho na yll hy cara Lir gans kerensa heb finwedh. Pàn wrella Lir clôwes an geryow-na ev a grës Cordêlya dh’y dhespîtya; hag indella ev a lever na wra va ry argovrow vëth dhedhy. Cordêlya a’s teves dew dantor. An kensa anodhans yw dûk Bùrgoyn. Pàn wrella ev desky Cordêlya dhe vos heb argovrow, yma va ow kelly pùb les inhy avell gwre’ty. An tantor aral, Mytern Frynk, wàr an tu aral a lever Cordêlya dhe vos argovrow inhy hy honen hag ev yw pës dâ demedhy gensy heb argovrow vëth. In Wordhen y fedha argovrow practycys spessly gans tiogow bys i’n termyn cot alebma. An ger Godhalek rag argovrow yw spré. Yth yw an spré pò an fowt a spré campollys in lies cân weryn adro dhe vowes teg gesys heb demedhy dre rêson hy bos bohosak hag ytho heb argovrow. Yma lies whedhel kefys kefrës ow tùchya den yonk constrînys dhe dhemedhy gans benyn nag yw teg ha nag usy ev ow cara yn udnyk rag hy argovrow. Dell yll bos gwetys, nyns usy an maryajys a’n par-na ow trailya in mes re lowen rag gour na rag benyn. Rag hedna me a vydn gasa an ger dewetha gans an lavar coth Godhalek: Imíonn an spré ach ní imíonn an streille ‘An argovrow a wra dyberth (hèn yw, a vëdh spênys), saw ny wra an hager-fâss dyberth nefra.’