(296) Binghamstown


© 2015 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Teylu Bingham a dheuth dhe Wordhen in termyn an kensa Elisabet hag y a wainyas ragthans aga honen meur a diryow in West an pow hag in tyleryow erel kefrës. Y feu pedn an teylu gwrës Yùrl Lûcan orth dyweth an êtegves cansvledhen. Richard Bingham, genys nebes bledhydnyow dhyrag Secùnd Gwerryans an Bës, a veu seythves Yùrl Lûcan. I’n vledhen mil naw cans seyth deg in strîf gans y wre’ty ev a ladhas magores y flehes, assaultya y wreg hag ena fia dhe’n fo in carr tan benthygys. Ny veu va gwelys bythqweth wosa hedna. Scoren aral a deylu Bingham ha le a bris ès Yùrlys Lûcan, a gafas tiryow wàr worenys pò peninsula an Mùllet in North-West a Gonteth Mayo. Orth dyweth an êtegves cansvledhen Major Denis Bingham, pedn an scoren-na, a dherevys tre nowyth wàr an worenys hag ev a’s gelwys Binghamstown. I’n dedhyow-na y fedha bestas ha gwara kemerys dhia dyller dhe dyller wàr an mor, rag nyns o dâ an fordhow, pò nyns êns y gwrës kyn fe. Ny wrug Binghamstown soweny, rag nyns esa hy ryb an mor—ha’n porth moyha ogas o hanter-mildir dhyworty. Tiogow bian y estât ytho a dhalathas drîvya aga bestas nebes mildiryow dhe’n north rag aga gwertha in Belmùllet, tre vian esa an mor wàr an dhew denewen anedhy. Major Bingham, rag sensy y dre y honen yn few, a wrug derevel yet brâs dres an fordh. Res o dhe’n bobel tylly mona rag mos der an yet gans aga gwarthek, mars êns y whensys dh’aga dry bys in Belmullet. Dhyworth an yet-na y teuth hanow Godhalek Binghamstown: An Geata Mòr pò ‘An Yet Brâs.’ Ny wrug an prat spêdya bytegyns rag pobel y estât a dhyscudhas y hyllens mos dhe Belmullet fordh aral heb mos vÿth der an yet. Esely teylu Bingham a verwys in mes wàr an Mùllet i’n nawnjegves cansvledhen ha nyns yw Binghamstown hedhyw ma’s pendra vian. Nyns eus inhy ma’s udn strêt, udn shoppa, udn eglos Gatholyk, udn sodhva post ha nebes treven, radn anodhans dianeth. Yma Belmùllet wàr an tu aral ow floryshya hag owth encressya pùpprës.