(298) Kylmyn Sans


© 2014 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a veu in Newry agensow, tre in Conteth Down in Wordhen North. Yma Newry in epscobeth Catholyk Dromore hag yma peneglos fest teg i’n dre. An beneglos-na a veu byldys in kensa hanter a’n nawnjegves cansvledhen ha sacrys yw dhe Colman, sans tasek Dromore. Ny woryn ny nameur a yllyn ny trestya dhodho ow tùchya Colman. Warlergh lyver y vêwnans bytegyns y feu va genys i’n North-Ÿst a Wordhen neb termyn in cres an wheghves cansvledhen. Ev a fùndyas managhty i’n côstys-na ha wosa hedna mos wàr brierynsys dhe Rom, le may feu va consecrâtys epscop gans an pab. Wàr y fordh wàr dhelergh dhe Wordhen yth esa Colman in Breten Veur, pàn wrug an Vyternes don mab bian, saw an mab o marow. Dre bejadow Colman an flogh a veu dasvewys hag ev a devys in bàn dhe vos Dewy Sans, chif sans Kembra. Sacrys dhe Colman yw Llangolman ha Capel Colman in Conteth Penvro in Kembra. Nyns yw tyller vëth kelmys gans Colman in Kernow, dell hevel, saw yma nebes versow a les in gwary Kernowek Origo Mundi. I’n gwary yth yw Salamon, Mytern Isrel whensys dhe vyldya templa dhe Dhuw in Jerùsalem. Rag hedna ev a ergh dh’y vessejer declarya dres an cyta bos res dhe oll carpentoryon ha masons dos heb let dhe’n mytern, may fo dalethys an templa. An servant a lever:

syr arluth re synt gylmyn

my a wra the worhemmyn

ol yn tyen

hag a warn the vysterdens

avorow thy’s may teffens

yn ketep pen.

Yma an ger mysterdens ow styrya creftoryon, heb mar. Yma servant Salamon Mytern owth ûsya an lavar re Synt Gylmyn. An hanow Gylmyn dell hevel yw Kylmyn gans trailyans parhaus pò permanent mutation wàr an kensa kesson. An form Colman in henwyn Kembrek kepar ha Llangolman yw an form lienek Colman. Saw an hanow Latyn Colmanus, ow tos der an Kernowek Coth a vynsa ry KelmenKylmyn in Kernowek Cres. Yth hevel ytho fatell yw Colman Sans campollys unweyth dhe’n lyha in Kernowek. Dre rêson bos lies onen henwys Colman in mesk sens an eglos Keltek, ny yllyn ny leverel yn certan yw an sans campollys in Origo Mundi ha Colman Dromore an keth den. Ha pelha ny yllyn ny leverel prag y whrug person in gwary grôndys wàr an Testament Coth campolla an sans Cristyon i’n kensa le. A pen ny abyl dhe wortheby an qwestyons-na, martesen ny a woffia moy adro dhe Colman/Kelmyn hag adro dhe’n devôcyon dhodho in Kernow in Osow Cres. Saw an re-na yw maters a dal dhybm gasa dhe bobel erel.