© 2015 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Ny veu an stât Frynkek re faverus bythqweth dhe davas Breten Vian na dh’y gonesygeth. Pàn wrug an Jermans conqwerryaFrynk i’n vledhen mil naw cans ha peswar deg, lies kenedhlegor Bretonek a gresy y fedha taclow gwell ragthans ès dell êns in dadn an Poblegeth Frynkek. Y feu Bretonek clôwys wàr an radyo hag y fedha Bretonek deskys i’n scolyow. Dre rêson a hedna radn a’n Vretonyon a scodhyas an Jermans; res yw perthy cov inwedh fatell o an radn vrâssa a’n Vretonyon Catholyk ha mentenus pò conservative hag indella fest crev warbydn an Volshevygyon. Yth esa radn aral a’n Vretonyon bytegyns ow meras orth an Jermans avell eskerens hag a jùnyas an Résistance. Abbé Jean-Marie Perrot o pronter Catholyk ha kenedhlegor Bretonek i’n dedhyow-na. Ev a veu ledhys gans comûnyst i’n Résistance in mis Gwydngala mil naw cans peswar deg try. Y feu fors bian a genedhlegoryon vreselek fùndys in Breten Vian i’n bledhydnyow deg warn ugans. Das’henwys veu an fors-na warlergh an pronter marow hag a recêvas an hanow Bezen Perrot pò Lyjyon Perrot. An bagas-na a veu gorrys in dadn gevarwedhyans an Jermans hag a veu consydrys gansans dhe vos scoren Vretonek an Waffen SS. Alan Heusaff a jùnyas Bezen Perrot ha wosa an gwerryans ev a veu dampnys dhe’n mernans. Ev a fias dhe Wordhen hag a spênas remnant y vêwnans obma. Ev a wythresa obma in mesk taclow erel avell kenedhlegor Keltek. Den aral neb a jùnyas Bezen Perrot o Louis Feutren. Warlergh an gwerryans ev inwedh a fias dhe Wordhen. Ev a gafas dyscans tressa level in Galway ha dres lies bledhen ev a dhesky Frynkek in scol bryva in Dulyn. In y gemynlyther pò will Feutren a asas mona dhe Lyverjy Kenedhlek Kembra ha dhe Gescowethyans rag an tavas Bretonek in Breton Vian. An dhew dyller a sconyas an mona dre rêson a golm Feutren gans an Nazis. Roparz Hémon o kenedhlegor Bretonek aral ha scoler brâs a’n tavas Bretonek. Ny veu va bythqweth esel a Bezen Perrot saw ev a rendras servys dhe’n Jermans in Breten Vian in bledhydnyow Secùnd Gwerryans an Bÿs. Warlergh an gwerryans ev a fias dhe Wordhen kefrës hag a bêsyas gans y ober academek. Ev a dhyllas lies lyver lettrys ow tùchya an tavas Bretonek. Onen anodhans o gramer marthys dâ a Vretonek Cres. Trist lowr ny wrug Roparz Hémon dewheles bythqweth dhe Vreten Vian.