(300) Anserhak


© 2014 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a dhalathas desky Godhalek Wordhen in gwir pàn en vy studhyor gradhek in Resohen ha me ow qwil cors dyw vledhen in studhyansow keltek. An cors-na a dhalathas i’n vledhen mil naw cans whegh deg pymp. I’n keth bledhen governans Rodêsya in dadn Ian Smith a dheclaryas aga fow dhe vos anserhak dhia an Vreten Veur heb pesy cubmyas vëth orth an governans in Westmynster. I’n dedhyow-na me a vedha ow coslowes orth Raidió Éireann (Radyo Wordhen), may hallen clôwes hag ytho desky an tavas Godhalek. Pòr gebmyn wàr nowodhow Radyo Wordhen ow tùchya Rodêsya i’n dedhyow-na o an term Godhalek fógairt aontaobhach neamhspleáchais (‘unilateral declaration of indespendence’). An ger Godhalek neamhspleáchas, jenytyf neamhspleáchais ‘independence’ a vedha a les brâs dhybm. Me a sarchyas ha dyscudha y vos grôndys wàr an ger neamhspleách ‘independent’. Neamhspleách wàr y dro yth yw grôndys wàr an ger Godhalek spleách ‘flattering, clinging, dependent’. Yth hevelly dhybm i’n tor’-na y hylly an tavas Kernowek gwil devnyth a’n keth tybyans. In Gerva an Kernowek Coth ny a gav an ger les serchoc ‘burdock, Arctium lappa’; yma frûtys an plans-na ow clena orth dyllas pobel hag orth pelour ha blew bestas. Gelwys yw les serchoc in Kernowek Coth (les serhak a via an leveryans in Kernowek Cres), hèn yw dhe styrya ‘loving plant, clinging plant’ dre rêson an frûtys bian dhe sensy dhe bobel ha dhe vestas. Grôndys wàr an ger serhak ‘loving, clinging’, me a dhevîsyas an ger anserhak ‘not clinging, independent’. Ow ger nowyth-gwrës anserhak a omdhysqwedhas in prynt rag an kensa treveth, me a grës, in An Lef Kernewek, nyver onen màn eth (Gwâv, mil naw cans wheg deg naw), folen pymp, in lyther a screfys vy ow honen dhe’n dyllor, Talek. Yth esen tregys in Wordhen warbydn an prës-na hag yth esoma ow côwsel i’n lyther adro dhe Wordhen avell an un pow keltek yu anserhak ‘the only Celtic country that is independent’. Warlergh hedna, dell hevel, y feu an ger anserhak ‘independent’ degemerys tabm ha tabm gans Kernowegoryon. Mars eson ny whensys dhe leverel ‘independence’, res yw dhyn gwil devnyth a anserhogneth; gwrewgh comparya bohosak ‘poor’ saw bohosogneth, bohojogneth ‘poverty’ in Bewnans Meryasek. A les yw ytho nag yw an Kernowek rag ‘independent’ grôndys naneyl wàr an Kembrek na wàr an Bretonek, saw wàr neamhspleách in Godhalek Wordhen.