© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Bêwnans Ke an wheffes cadnas a lever fatell yw Lûcyùs, emprour Rom arayes in dyllas gwrës a gwethow rych. In mesk padnow y dhyllas yma an cadnas ow compla velvet, cendal, satyn ha damask. Yma damask i’n rol-na ow referrya dhe sort a badn gwies gans fygùrys ino, spessly in owrlyn pò ‘silk’. Yma an ger damask ow tos dhyworth hanow chif-cyta Syrya. Hedhyw an tyller-na yw gelwys Damascùs saw an form in Sowsnek Cres o Damask. I’n Osow Cres avarr yth esa an cyta a Dhamask wàr fordh an owrlyn inter Cathay hag Ewrop hag y fedha meur a badnow rych gwrÿs inhy kefrÿs. Yth yw Damask, an cyta, complys liesgweyth i’n Testament Coth, saw an tyller yw gwelha aswonys in Actys an Abosteleth i’n whedhel a drailyans Sen Powl. I’n nawves chaptra ny a red fatell esa Sawl ow ton lytherow dhyworth an uhel-pronter in Jerùsalem dhe synagys an Yêdhewon in Damask. Ev o whensys dhe dhalhedna sewysy Jesu Crist in Damask ha’ga dry dhe Jerùsalem. Wàr an fordh bys i’n cyta ev a welas vesyon a’n Arlùth hag a drailyas dhe Grist. Alena rag Sawl a vedha gelwys Powl hag ev a veu an brâssa in mesk an abesteleth. Gesowgh ny lebmyn dhe veras orth Jenesys. Kynth yw leverys i’n lyver y formyas Duw mab den, nyns yw derivys ple whrug ev y formya kyns ès y settya i’n paradîs. Herwyth udn tradycyon Jerùsalem, neb yw cres an bÿs, o an tyller a greacyon agan hendas Adam. Herwyth tradycyon aral y feu Adam formys i’n Valy Ebron. Yth yw an tradycyon-na sewys gans auctour Creacyon an Bÿs rag i’n gwary Duw a lever:

Gallas Lûcyfer drog-prëv

mes a’n nev dhe dewolgow

ha lemmyn in y le ev

me a vynn heb falladow

unn den formya

in Valy Ebron defry

rag collenwel iredy

an le may teuth anodho.

Yma an tressa tradycyon, dell hevel, ow tallath gans Sen Jerôm. Nyns yw devedhyans an hanow Damask godhvedhys, saw dre rêson an wredhen Semytek dam- dhe styrya ‘goos’, Sen Jerôm a dhesmygyas fatell esa an hanow Damask ow mênya ‘owth eva goos.’ Jerôm ytho a golmas hedna gans an peswora chaptra a Jenesys, pàn lever Duw dhe Gaym wosa denladh Abel: Otta voys goos dha vroder ow kelwel dhia an dor warnaf. Rag hedna Jerôm a dhetermyas fatell esa Caym hag Abel warbarth ryb Damask, pàn veu Abel ledhys gans y vroder. Herwyth an Beybel ny wrug Caym departya dhyworth y das ha’y vabm erna veu va molethys dre rêson a dhenladh Abel. Yth hevel ytho fatell veu Adam hag Eva formys in côstys Damask kefrÿs. Kynth yw Valy Ebron an tyller may feu Adam formys in Creacyon an Bÿs, yma auctour Origo Mundi ow sewya tybyans Sen Jerôm. In dallath Origo Mundi an Tas a Nev a lever: mab den a bry yn perfeth me a vynn y vos formys ha’n keverwedhyans gwaryva Latyn a lever Hic faciat Adam {in agro damasceno} ‘Obma y whra Duw formya Adam i’n gwel ryb Damask.’