© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yma tavern meur y hanow dhe’n west a Dhulyn henwys The Red Cow Inn. Tavern coth ywa neb a veu fùndys in dyweth an seytegves cansvledhen. Coynt yw an hanow Red Cow, erna wrella nebonen predery a’n Godhalek. In Godhalek yma an lavar bó dhearg ‘buwgh rudh, red cow’ ow styrya buwgh a lyw gorm; hèn yw ‘dark brown cow’ ha dell hevel hanow an tavern a dheuth dhyworth hedna. Saw yma an keth ger-na dearg ow styrya rudh pò cogh pàn wreller côwsel adro dhe’n goos in corf. Yma samplys erel in Godhalek a’n ancertuster ow tùchya lywyow: yma an ger glas ow mênya ‘gwer’ ow referrya dhe dhelyow ha gwels, saw y styr yw loos ‘grey’ ow tùchya buwgh pò cath. In kepar maner an ger Godhalek gorm yw ûsys rag blou ow tùchya an ebron, saw du adro dhe grohen den. Ytho in Godhalek an ebron yw gorm saw Afrycan yw gorm kefrës. Y hyll an ûsyans coynt a lywyow bos gwelys in Kernowek inwedh. In tyleryow i’n textys Kernowek yma an ger glas ow styrya ‘green’, spessly ow tùchya taclow usy ow tevy. In Origo Mundi rag ensampel Jafet, mab Noy, a lever adro dhe’n golom danvenys in mes a’n lester in termyn an livyow devedhys yw hag yma in hy min branch olyf glas ‘she has come with a branch of green olive in her beak.’ In Resurrexio Domini wàr an tenewen aral y lever nebonen adro dhe gorf Pylat: deun ganso dewhans toth brâs rag y worra i’n dowr glas yw ow desîr ‘let us go quickly immediately, for my desire is to place him in the blue water’. Dre lycklod y feu an fowt a styr dyblans gans an ger glas i’n tavas a wrug dhe Gernowegoryon sevel orth ûsya glas avell ‘blue’ ha ‘green’ warbarth ha gwil devnyth a eryow erel. Yma ger kefys in Kernowek coth rag green, hèn yw gwerdh, ha gwer ywa moy adhewedhes. Hèn yw an ger preferrys gans Lhuyd hag yma va ow côwsel adro dhe dhelyow gwer ha bos neppyth gwer avell an gwels. Y kefyr an ger blou ‘blue’ in Bewnans Ke hag in Lhuyd kefrës. Saw apert yw dhyworth gerva Lhuyd nag o an ger glas ‘blou pò gwer’ ûsys na fella in Kernowek y dhedhyow ev. Nyns yw cales convedhes prag yth yw an lywyow mar dyckly in tavosow Keltek. Y wharva aga dasplegyans pàn nag o desmygys oll an lywyow arnowyth gwrës gans kemystyon organek an nawdhegves ha’n ugansves cansvledhen.