(312) Sen Jerôm - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Sen Jerôm yw campollys in Homylys Jowan Tregear avell scolar brâs a screfas adro dhe auctours Cristyon. Sen Jerôm a veu genys adro dhe try hans seyth in tyller gelwys Stridon in Slovênya agan dedhyow ny. Ev yw aswonys spessly avell trailyor an Beybel Sans dhe Latyn. Ev a drailyas an Testament Coth dhyworth an Ebrow hag an Aramek adar dhyworth an versyon Grêk. Jerôm a spênas an secùnd hanter a’y vêwnans i’n Pow Sans ow studhya an tavosow Semytek-na hag ow parusy y drailyans. Ev a verwys i’n vledhen peswar cans hag ugans in Bethlem. Y versyon Latyn a vedha mar venowgh ûsys may feu va henwys Biblia Vulgata pò an Vulgât ‘Beybel an Bobel.’ Pàn o Jerôm whath yonk ha kyns ès ev dhe vos ornys prownter ev a viajyas dhe lies tyller in Empîr Roman. Ev a veu termyn in Augusta Treverorum in provyns Belgica (Trier in Jermany hedhyw) tyller i’n dedhyow-na o aswonys avell crêsen vrâs lien ha dyscans. Bledhydnyow warlergh hedna wàr y fordh tro ha’n Pow Sans Jerôm a bassyas dre Asya Vian (Tùrky hedhyw) hag in mesk tyleryow erel ev a vysytyas Galatia. Tregoryon Galatia, an Galatae pò an Galathyans o an bobel may screfas Sen Paul an epystyl dhedhans. An Epystyl dhe’n Galathyans a veu screfys in Grêk heb mar, rag Grêk o tavas kebmyn radnow ÿst an Empîr Roman. Pàn wrug Jerôm dylla y drailyans a’n Epystyl dhe’n Galathyans, ev a leverys in y venegyans rag an epystyl fatell o tavas genesyk an Galatae pòr haval dhe’n tavas a glôwas ev in Trier in Gallia Belgica. Mar kyller trestya dhe lavarow Jerôm, ytho, i’n secùnd hanter an peswora cansvledhen yêth Keltek o côwsys in Gallia Belgica ha yêth pòr haval dhedhy in Galatia, in Asya Vian. Yma hedna ow mênya fatell o yêth Keltek côwsys in dedhyow Jerôm i’n West a’n Empîr Roman hag i’n Ÿst kefrÿs— heb gwil mencyon a’n tavosow Keltek côwsys i’n oos-na in Breten Veur hag in Wordhen.