(313) Cumann Gaelach


© 2014 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Hevleny yth yw cans bloodh coth Cumann Gaelach na hEaglaise pò Cowethas Godhalek an Eglos; hòn yw an gowethas usy ow whelas avauncya an tavas Godhalek in Eglos Wordhen. Eglos Anglycan yw Eglos Wordhen hag ytho whor dhe Eglos Pow an Sowson. Coynt yw dhe lies huny an tavas Godhalek dhe vos a les dhe Brotestans. In Wordhen meur a’n bobel a grës an tavas Godhalek dhe longya dhe’n Gatholygyon Roman: an drevesygoryon (pò colonists) o Sowson hag a gôwsy Sowsnek; saw an enesygyon (pò natives) o Gwydhyly hag a gôwsy Godhalek. Saw hèn yw re sempel. In bledhydnyow avarr an Reformacyon in Wordhen apert yw fatell recêvas lies huny a’n enesygyon an grejyans reformys. Wàr neb cor an kensa lyver pryntys in Wordhen i’n tavas Godhalek a dheuth in mes i’n vledhen mil pymp cans seyth deg onen ha’n lyver o catekîs Anglycan. An eglos Anglycan in Wordhen a dhyllas an Testament Nowyth in Godhalek in bledhydnyow avarr an seytegves cansvledhen hag y feu dyllys an Lyver Pejadow Kebmyn termyn cot warlergh hedna. Kemerys oll warbarth pymp trailyans dyffrans a Lyver Pejadow an Anglycans re beu dyllys in Godhalek, an versyon moyha adhewedhes deg bledhen alebma. An Testament Coth a veu trailys dhe’n tavas Godhalek in kensa hanter a’n seytegves cansvledhen, saw ny veu an lyver dyllys bys pedn moy ès dew ugans bledhen wosa hedna dre rêson a dheray hag ancrês brâs i’n pow. An Sows, William Bedell, a wrug gwil dhe’n testament coth bos trailys. Bedell a veu genys in Essex hag a gafas y adhyscas in Kergraunt. Sacrys veu avell epscop Kilmore in Conteth Cavan i’n vledhen mil whegh cans ha dew dheg naw. An Testament Nowyth ha Testament Coth Bedell a veu gorrys warbarth ha dyllys yn fenowgh dres an bledhydnyow avell beybel Godhalek pò beybel Bedell. Ny veu versyon Roman Catholyk a’n beybel dyllys bys bledhynyow seyth deg an gansvledhen dhewetha. Kyns ès an termyn-na y whre eglos Catholyk Wordhen meur a dhevnyth a drailyans Bedell, kynth esa an eglos Catholyk ow consydra esely eglos Wordhen dhe vos eretykys. Pobel gebmyn Wordhen bytegyns a gresy yn crev na ylly an Jowl  côwsel Godhalek, hag ytho beybel Bedell dhe vos frank a bùb fâls-crejyans.