(318) Atlas


© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Atlas in mythologieth an Grêkys o Tîtan, mab dhe Iapetus ha broder dhe Promêtheùs. Warlergh an whedhel Atlas a’n jeva lies myrgh, in aga mesk an Hesperydês. Pàn veu an Tîtans fethys gans duwow Olympùs, Atlas a veu dampnys dhe sensy an ebron in bàn bys vycken. An Grêkys a bredery fatell esa Atlas ow sevel i’n West orth pedn pelha an Cresvor. Moy adhewedhes yth o cresys Atlas dhe vos menydhyow uhel wàr an cost north-west a Afryca. Hercùlês o mab a Jùbyter gans an venyn Alcmênê. Jûnô, gwre’ty Jùbyter, a berthy gorvyn tro ha Hercùlês drefen ev dhe vos genys a Alcmênê, neb o a gynda mab den. Jûnô ytho a ordnas may fe Hercùlês gostyth dhe vytern Mycênê, neb a ros dhodho dewdhek ober cales fest dhe gollenwel. Onen a oberow Hercùlês o dhe wainya avallow an Hesperydês in mes a’ga lowarth i’n West. Yth esa dragon uthyk ow qwardya an lowarth. Hercùlês a vargydnyas gans Atlas, y whre va sensy an ebron in bàn pols hag Atlas a ylly cafos an avallow in mes a lowarth y vyrhas, an Hesperydês. Lowen o Atlas bos delyfrys a’y ober uthyk ha determys o na wre va nefra arta kemeres an devar-na orto y honen. Ev a gafas an avallow ha’ga dry dhe Hercùlês, neb a’n pesys dhe sensy an ebron in bàn rag tecken arta. Ny welas Atlas fatell o hedna cast hag ev a gemeras an ebron wàr y dhywscoth rag an secùnd treveth. Hercùlês a sêsyas an avallow ha diank gansans. Res o dhe Atlas don an ebron wàr y dhywscoth alena rag. In agan dedhyow-ny ‘atlas’ in Sowsnek yw an hanow rag lyver mappys. Yma an styr-na ow tos dhyworth lyver mappys dyllys orth dyweth an whêtegves cansvledhen gans Gerardus Mercator doryth ha cartografyth Flamank. Ev a henwys onen a’y lyfryow a vappys in onour an Tîtan, hag yma an ûsadow whath ow pêwa. Câss jenytyf Atlas yw Atlantos ha dhyworth hedna ny a gav an hanow gwadn Atlantek in Mor Atlantek. Pelha an Grêkys a gôwsy adro dhe bow galosek in cres an mor-na gelwys Atlantis. Awos sherewynsy y cytesans an dhuwow a dhystrôwas an wlas gans dorgîsyow hag Atlantis a wrug sedhy in dadn an todnow. Yma an tybyans a bow budhys kefys inwedh i’n tradycyon Bretednek. Yth esa an Vretonyon ow cresy fatell esa cyta henwys Ker Is i’n mor dhe’n west a Douarnenez. Herwyth an whedhel mytern Ker Is a’n jeva myrgh pòr wocky. Pàn gafas hy an alwheth hy a egoras yet in fos an mor. An dowr resas ajy ha budhy pùbonen marnas an mytern y honen. In Kembra yth esa an bobel ow cresy bos tyller henwys Cantre’r Gwaelod in Baya Keredygyon, saw budhys veu hedna kefrÿs. In Kernow y fedha whedhel derivys, adro dhe Lethesow pò ‘Lyonesse,’ gwlascor efan inter Pedn an Wlas ha Syllan. Udn nos an mor a dherevys ha budhy oll an pow. Yth yw an whedhel-na derivys in maner vew gans Craig Weatherhill in y novel Jowal Lethesow.