© 2021 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

John Milton a screfas bardhonak teg henwys ‘Sabrina.’ Yma an versyow in Sowsnek ow tallath indelma: ‘Sabrina fair/ Listen where thou art sitting/ under the glassy cool, translucent wave.’ Sabrina i’n bardhonak yw spyrys dowr ha dell hevel yma an geryow gorrys in ganow mowes usy ow pesy Sabrina dhe selwel hy onour ha’y vertu warbydn den usy ow whelas hy defolya. Kyn nag yw kebmyn Sabrina avell hanow mowysy yth ywa ûsys traweythyow. In bledhydnyow hanter-cans an gansvledhen dhewetha an Amerycan Samuel A. Taylor a screfas gwary in dadn an tîtel ‘Sabrina Fair.’ An drama a veu performys wàr Broadway hag o sowena vrâs. An whedhel yw kepar dell sew: yma teylu pòr rych henwys Larabee tregys i’n mansyon in Enys Hir in Stât Evrok Nowyth. Y yw rych dre rêson a’ga negyssyow. Cowethasow dyvers an teylu yw menystrys gans an broder cotha, Linus. Yma kenyver onen ow cresy ev dhe vos yêyn ha heb emôcyon. Nyns yw bern dhodho ma’s negys, profyt ha mona. An broder yonca yw David. Ev wàr an tenewen arall yw dynyak ha sêmly hag yma dhodho rew a garoresow. Wàr an dyweth bytegyns David yw ambosys dhe dhemedhy benyn yonk hag udn vyrgh cothman coth tas David ha Linus. Porposys yw gans Linus jùnya cowethas Larabee dhe gowethas tas an vyrgh. An gorudnyans pò ‘merger’ a vëdh a les brâs dhe’n dhew gowethas. In mesk oll aga servysy teylu Larabee a’s teves drîvyor pò ‘chauffeur’. Ev yw gwedhow ha’y udn vyrgh yonk yw Sabrina. Dhyworth dedhyow hy floholeth yma hy ow cara David in dadn gel. Saw nyns yw Sabrina bern poynt dhe David. Hy thas a’s danvon dres dyw vledhen dhe Parys may halla hy ankevy hy obsessyon anyagh. Pàn dheffa hy tre, hy yw leundevys, bysfel ha teg dres ehen. Yma David orth hy merkya avell benyn yonk rag an kensa prÿs hag ow tallath dysqwedhes les inhy. Linus a wel hedna hag a wor fatell wra kerensa inter David ha Sabrina dystrôwy an gorudnyans porposys. Rag hedna yma va ow tôwlel towl dhe dhynya Sabrina y honen, saw yma Linus, an den negys yêyn ha heb colon, heb y wetyas ow codha y honen in kerensa gans Sabrina. Y feu fylm gwrës dywweyth a ‘Sabrina Fair.’ Kyns oll in mil naw cans pymp deg peswar gans Humphrey Bogart avell Linus hag Audrey Hepburn avell Sabrina. An secùnd versyon a veu gwrës in mil naw cans naw deg pymp gans Harrison Ford ha Julia Ormond. Yth esoma ow honen ow preferrya an secùnd versyon a’n fylm. Sabrina heb mar yw hanow Keltek hag in gwir yth yw Sabrina hanow coth an ryver aswonys dhyn hedhyw avell ‘the River Severn’. Yma pùbonen ow leverel an hanow Sabrina gans hir in secùnd sylaben. Ny vedha an hanow leverys indelha in Keltek Coth bytegyns. *Sabrîna a vynsa dysplêgya in Kembrek avell *Hefrin, saw in Kembrek ‘Severn’ yw Hafren. Yma hedna ow tysqwedhes fatell vedha an hanow coth leverys Sabrina gans i cot. Ny a yll determya ytho fatell via ‘the River Severn’ Dowr Havren in Kernowek.