© 2021 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An Arachnida yw bagas bestas heb ascorn keyn usy garrow mellek dhodhans. An dhew vest moyha kebmyn i’n clâss-na in Sowsnek yw gelwys ‘spider’ ha ‘scorpion.’ Kyns oll gesowgh ny dhe veras orth an kensa best a’n re-na. Res yw avowa nag yw ger vëth rag ‘spider’ kefys i’n textow Kernowek. Dre rêson a hedna yma Nance ow profya kefnysen ‘spider’, cùntellek kefnys, versyon Kernowekhës a kevnidenn in Bretonek. Nyns yw godhvedhys pandr’yw devedhyans an ger kevnidenn. Yma Richard Gendall ow teclarya fatell veu an form kenesen kefys in Sowsnek Kernow, ha hedna, mars ywa gwir, yw dùstuny rag kefnysen in Kernowek. I’n gwetha prës nyns usy Gendall ow ry penfenten vëth. Yth hevel fatell usy an ger Sowsnek ‘spider’ ow tos dhyworth kenform *spinthra, hanow usy an wredhen spin- ‘nedha’ inhy. Ny a yll comparya an Jerman Spinne ‘spider,’ usy an keth gwredhen ino. Yma spider ha Spinne ytho ow referrya dhe’n fordh may fëdh an best ow qwil gwias rag cachya kelyon. In Godhalek Wordhen yma dew hanow rag kefnysen. An kensa yw damhán alla, ‘carow bian an clegar.’ An secùnd yw fíodóir ‘gwiader’, form usy ow referrya arta dhe’n fordh may whra an best gwias rag cachya kelyon ha treghvilas erel. Dell usy ow wharvos nyns eus ger Keltek in Kembrek rag kefnysen. Yma an Gembrion ow leverel copyn. Hedna a veu benthygys dhyworth coppa ‘kefnysen’ in Sowsnek Coth. Yma an element cop gwelys whath in attercop ‘kefnysen’ in radnyethow Sowsnek. Kynth usy attercop ow mênya ‘kefnysen’, herwyth an lytheren styr an hanow yw ‘pedn poyson,’ rag yth esa an bobel ow cresy an gefnysen dhe vos venemys. Heb mar nyns yw coppa, cop kefys in Sowsnek na felha marnas in ‘cobweb’, moy avarr cop web ‘gwias an gefnysen’. Dell veu leverys solabrÿs, ordyr aral a Arachnida yw an Scorpiones ‘scorpions’. Nyns yw ger vëth rag ‘scorpion’ i’n textow Kernowek saw yma Nance ow profya scorpyon, form kemerys dhyworth Sowsnek Cres. Êsy yw aswonvos an scorpyon. Kepar ha’n gefnysen an scorpyon a’n jeves êth garr, saw ev a’n jeves inwedh dew bynsor brâs arâg, hag adhelergh lost mellek, stubmys in gwarek a-ugh y geyn. Yma gwan i’n lost. Brath an scorpyon yw tydn saw dre vrâs nyns ywa marwyl. I’n Testament Coth Roboam Mytern a lever dh’y bobel ow tùchya an dyffrans inter ev y honen ha Salamon y das: Ow sîra a wrug agas chastia gans whyppys, saw me a vydn agas chastia gans scorpyons. Ny worama mars o doth ragtho dhe vraggya y sojetys indelha, saw hèn yw whedhel aral. I’n gwelha prës nyns yw scorpyons genesyk in Breten Veur na Wordhen, saw y a yll bos kefys in soth a Ewrop hag in lies pow erel. Yma an ger scorpyon gwelys kefrÿs in Kernowek dasvêwys i’n ger scorpyonles (Myosotis) ‘forget-me-not’, hanow kemerys dhyworth Kembrek ysgorpionllys ‘losowen scorpyon.’ Yma an hanow-na ow referrya dhe shâp an flourys hag y crobm kepar ha lost scorpyon.