(334) Eskelly Grehyn - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Warlergh Lhuyd an best aswonys in Sowsnek avell ‘bat’ in Kernowek yw skelly grehyn, pò skerly grehyn. Dre lycklod an form wredhek in Kernowek o eskelly crehyn pò askell grohen, rag an hanow Bretonek yw askell groc’hen. Ny dheleth ûsya an term eskelly grehyn pùppres hag ytho gwell yw traweythyow ûsya ger kefys in Kernowek Coth: ughsommys, hanow usy ow styrya ‘ow qwaya avàn’. Best pòr goynt yw an eskelly grehyn rag yth ywa brodnek pò ‘mammal’ saw yma va ow neyja kepar hag edhen. Yma an eskelly grehyn owth omdhysqwedhes in tewolgow. An Latyn rag eskelly grehyn yw vespertilio, hanow yw growndys wàr vesper ‘gordhuwher’, ow referrya dhe’n termyn may fëdh an best owth appêrya. Vespertilio in Latyn a dhysplêgyas in Italyan avell pipistrello. Pipistrelle yw ûsys in Sowsnek rag ehen a eskelly grehyn. An ger kebmyn in Sowsnek rag an best yw ‘bat’; hèn o bakke in Sowsnek Cres ha dell hevel y feu an hanow benthygys dhyworth Nordek. Hanow aral in Sowsnek yw ‘flittermouse’ hag yth yw hedna an keth ger avell Fledermaus in Jerman. Yma an dhew hanow-na ow styrya ‘logosen usy ow terneyja’. I’n dedhyow coth cales o rag an bobel renkya an eskelly grehyn. Yma an Beybel orth y glassya avell edhen; rag in Dewtronomy chaptra peswardhek in mesk an ÿdhyn avlan ny a red: ‘an stork, an gerhyth, an hûpû ha’n eskelly grehyn.’ Yma whedhel derivys gans Aesop adro dhe ancertuster natur an eskelly grehyn. Y wharva gwerryans uthyk inter an ÿdhyn ha’n bestas ha nyns o possybyl kesassoylyans vëth. An strif o pòr gales ha lies onen wàr an dhew denewen a veu ledhys. Ny wrug teylu an eskelly grehyn dôwys tenewen vëth. Pàn esa an ÿdhyn ow qwainya, an eskelly grehyn o ÿdhyn. Pàn esa an bestas ow qwainya, an eskelly grehyn o bestas. Pàn o dewedhys an gwerryans, y feu debâtys omdhegyans an eskelly grehyn. Ny ylly aga thraitury bos perthys. An ÿdhyn ha’n bestas a jùnyas warbarth dhe dhrîvya in mes oll teylu an eskelly grehyn. Alena rag yma an eskelly grehyn ow keles aga honen in câvyow, in tourow tewl hag in magoryow forsâkys. Ha nyns usons y ow tos in mes ma’s i’n tewolgow. Yma drokhanow dhe’n eskelly grehyn rag yth yw leverys mar teu an best londya wàr bedn benyn, ev a wra magledna y honen in hy blew hag ùnpossybyl vëdh y dhyvagly. Dre rêson an eskelly grehyn dhe dhos in mes i’n tewlwolow yth yw an best kelmys gans bùckyas ha gwrahas. Pòr gebmyn yw an eskelly grehyn ytho in pyctours ow longya dhe Nos Calan Gwâv. Hanow aral Bretonek rag an eskelly grehyn yw logoden dall pò logosen dall. Nyns yw dall an voyhariv a eskelly grehyn saw nyns yw lybm aga golok. Rag neyja ha cachya kelyon i’n tewolgow yma an eskelly grehyn owth ûsya trovyans daslef pò ‘echolocation’. Ymowns y ow corra in mes cry uhel ha pàn wrella an son gweskel neb tra, yma va ow tewheles dhe’n best dhe dherivas dhodho ple ma an dra gweskys.